您的位置: 首页/八友集/團聚溫馨 年夜飯酒樓爆滿

團聚溫馨 年夜飯酒樓爆滿

Feb 13, 2018, 02:38 AM

  仲有幾日就係農歷狗年,係食年夜飯嘅時候。八友約咗兩個妻舅家庭喺禮拜嗰日響唐人街一間相熟酒樓晚飯,一個禮拜前訂位。入到餐堂,差不多全院滿座。游目四顧,但見每張枱都係兩代或三代同堂吃團年飯,有啲順便慶祝埋生日。八妻不在,妻舅兩家子已少聯絡,但年夜晚不可免,閒話家常,離唔開工作問題。“我都打算做到62歲就退休,唔等足額退休金囉!你睇我哋兩個家姐,都唔等養老金,話走就走,做咗咁多年工,益嗮政府。”兩個妻舅說。八友默然,佢哋講嘅有佢哋嘅道理,人生無常,今日唔知明日事,八友幾個朋友62歲就唔做工,終日無所事事,間中去賭城試手氣。退休後如果冇另外一個目標,日子都幾難打發?!

  酒足飯飽後,但見企枱忙碌收拾,睇下手錶,9點半,快到打烊時候。經理輝哥說,今天生意同禮拜六仲有一段距離。“噚日六點鐘已經排隊,一直忙到10點,做到我哋趴喺度,跟住呢幾日雖然係禮拜頭,但訂位好多,有排做呀!”據八友所知,團年飯大多喺年卅晚或年廿九大除夕成屋人一齊食,目的為咗團聚。年夜飯餸係意頭餸,有雞有魚有肉,髮菜蠔豉意味發財好事。以前尊重長輩,埋位要分長幼次序,等齊人先開飯,而家就冇咁多規矩。輝哥說,喺美國鬼佬地方,“竹升”仔女唔係好鐘意年夜飯呢種習俗,但近几年有所改變,好多“竹升”陪住阿爺阿婆食年夜飯,都好溫馨?!八友認為係拜中國熱所賜也。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版