您的位置: 首页/今日焦点/後生猛做唔旅遊 老咗後悔

後生猛做唔旅遊 老咗後悔

Mar 16, 2016, 02:06 AM

  美東珠海大學校友會日前春宴,學長李玉田會長宣佈今年10月組團番香港參加珠大慶典,順便到雲南旅遊。佢囑咐八友一定要同八妻參加。八友立即答允,就算八妻深閨唔想去,八友都單騎出行,因為旅遊對每個人來講都好重要。八友日前就睇到一段咁嘅報導:康乃爾大學人類發展教授培梅(Pillemer),用咗10年研究1200名老人嘅生活,結果發現佢哋往往對後生時冇経常旅行感到遺憾。佢話根據佢研究,幾乎可以保證如果唔趁後生旅行,以後會後悔。培梅用一句話概述佢嘅研究結果:當你旅行嘅日子結束時,你會希望能夠再旅行一次。

  旅遊對人來講係咪好重要?八友認為除咗孤寒唔想駛錢嘅人之外 ,都會話“係”,古語話“讀萬卷書不如行萬里路”,可見周遊世界不但擴闊自己眼界,更令身心健康。八友以前番大夜班,有好幾年冇外遊,成個人渾渾噩噩,後尾上番日班後,每年都去大陸香港走透透。視旅行為花無謂錢嘅妻舅不以為然:“年年用三四千銀出去玩,留番啲錢養老好過啦!”八妻啋佢都儍,仲勸佢多出家門看世界,做守財奴冇用。早前八友介紹過一個三十零歲世侄辭去高職走去環游世界嘅,春節前佢玩夠後番紐約。問佢開心否?細侄大讃不枉此生,佢去咗三個多月,用咗兩萬幾銀,走咗36國家,歐洲幾乎走勻,亞洲去咗越南、台灣、星馬泰,又走去澳洲。佢話非洲、南美洲仲未去,打算再做幾年工後,就去埋未去過嘅地方。八友甚為羨慕,神州大地,八友亦去過好多地方,但好想去嘅絲綢之路、蒙古、新疆,仲未有機會去,希望呢幾年有機會啦!否則年紀增長,就冇氣力矣!

本文版权属“纽约侨报”所有,转载请注明“来源:纽约侨报”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版