您的位置: 首页/八友集/廚師專業薪水低 應有小費

廚師專業薪水低 應有小費

May 26, 2016, 01:54 AM

  世侄小馮今年暑假之後升讀大學,佢話想搵份可以賺多啲錢嘅暑期工。建議佢去餐館做企枱或者做練習生,錢可以賺多啲,又唔駛點報稅。小馮話自己鐘意煑食,想做廚房。八友係過來人,知道廚師揾錢幾時都唔及企枱。因為企枱賺嘅係小費,如果餐館所處地點係中上好區,小費相當可觀,廚師嘅薪水拍馬都追唔上。有個相熟嘅廚師朋友抱怨,自己所賺嘅錢仲少過練習生,令佢心理有啲唔平衡。“唔理生意好壞,客人俾嘅貼士幾多,都同廚師毫無關係,我哋辛辛苦苦回報到底喺邊度?相信好多同行都感同身受。”

  有餐館業人士表示,普通廚師嘅薪水起碼少過企枱一半,廚師身水身汗,做到成隻水牛咁,但回報率就低得可怜。“唓!廚房佬唔識英文吖嘛!所以搵小啲囉!”有人如是說。其實唔可以咁講。八友另一個“竹升”世侄小關,自細鐘意煮食,讀書期間放暑假時到唐人街飯店做幇廚,大學未畢業,就到法式廚師學校學習。幾年前畢業,喺一間高檔餐館當二把手。但聽佢講,薪水同企枱相差一截。叫佢轉做樓面揾多啲。小關搖頭,話煑食喺佢最愛,佢最大願望係參加電視台嘅煑事大賽,一朝成名後開餐館。據所知,有啲大酒樓嘅企枱月入四、五千銀,頭廚都未必有咁嘅人工,其他廚師更加唔駛講。有人認為小費應算廚師一份。但勞工法例唔准,冇辦法囉!


本文版权属“纽约侨报”所有,转载请注明“来源:纽约侨报”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版