您的位置: 首页/八友集/曲藝家買少見少 B哥走好

曲藝家買少見少 B哥走好

May 20, 2016, 01:55 AM

  日前打開報紙,睇到著名粵劇表演藝術家、國家一級演員、粵劇“B腔”創始人陳小漢病逝嘅消息,不敢嘆息戲曲界今年流年不利;京劇大師梅葆玖,粵劇蝦腔宗師羅家寶最近相繼僊遊。估唔到陳小漢又急步離開。實乃戲劇界之重大損失。資料顯示,陳小漢生於1936年8月1日,係廣東臺山人。他出身於三代粵劇世家,11歲入行學藝,15歲初露鋒芒,拜粵劇大師薛覺先為師,跟隨著名粵劇表演藝術家靚少佳、羅品超,音樂名家尹自重,以及京劇名宿路凌雲學藝,打下堅實的藝術基礎。紐約僑胞對陳小漢應該唔會陌生,因為十多年前,前八和會館前主席陳燕鳴曾經邀請佢到紐約,舉辦“B腔”演唱會,深受戲迷歡迎。華埠唔少曲藝界人士對陳少漢離世,甚為婉惜,咸認老一輩紅伶,已經買少見少。

  講起粵劇粵曲,近日睇港聞,用咗27億元興建嘅西九文化區戲曲中心,重2400公噸嘅主劇場結構日前完成昇頂工程,中心預計喺2017年完工、2018年下旬啟用。等戲曲中心開幕後,將復辦西九大戲棚,喺中心嘅旁邊搭建戲棚,農曆年間演出。八妻睇到呢段新聞,大為雀躍。佢話自己係喺戲棚睇大戲長大,因為佢老豆老母係戲迷,周時帶埋佢幾姐弟去欣賞。六七十年代,好多戲班搭棚演出,佢屋企喺旺角,麥花臣球場多數喺節日搭棚做大戲。睇得最多係新馬仔,後來祥哥少做,佢哋轉而睇羽佳搭檔南紅演出。“羽佳同林家聲同期出道,我阿爸話羽佳嘅北派武打仲好過林家聲,只不過林家聲靚仔,多契媽。過兩年番去睇下大戲棚至得。”其實,香港有唔少離島、新界地區,喺逢年過節都會搭棚做神功戲。八友未睇過神功戲,喺香港亦只睇過一次大戲,反而喺紐約睇得最多。


本文版权属“纽约侨报”所有,转载请注明“来源:纽约侨报”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版