您的位置: 首页/八友集/陽具移植再成功 太监跳起

陽具移植再成功 太监跳起

May 18, 2016, 02:07 AM

  科學越來越發達,特別係醫術方面更匪夷所思。多年前吳宇森拍咗一部好萊塢大片《Face Off》,改頭換面也。一般人視之為天方夜譚,不可能之事。但近日得知,呢項技術已經有突破,兩三年之後將會喺中國進行換頭手術。得唔得?未知,但另一項驚人手術,已經再度成功,就係“彬周”(粵語專用名詞,意即文質彬彬行周公之禮。又稱陰莖、陽具、小弟弟、雀雀)移植經已取得成功。報載:美國麻省總醫院嘅醫生實施美國首例“彬周”移植手術。64歲癌症患者上個月經歷咗長達15個鐘頭手術後,目前正處於康復中。醫生希望呢個叫曼寧嘅白人男子排尿喺未來幾個禮拜內能正常,性功能亦喺幾周至幾個月內恢復。醫院喺一份聲明中說,“外科醫生將捐贈來嘅陰莖之錯綜複雜血管同神經結構移植到曼寧器官上。捐獻器官來自過世嘅病人。”

  聽講,曼寧係美國陰莖手術移植首例,早兩年喺南非曾經做過一次,受惠者舊年仲可以搞大女朋友個肚。所以,閣下點能夠唔驚嘆科學之神奇。八友認為,喺呢種醫例上,最偉大嘅應該係陽具捐贈者,因為小弟弟係男性嘅特癥,冇咗呢支玉柱,係男人嘅奇恥大辱。所以古之太監被下宮刑之後,都會將玉柱用防腐嘅藥水泡制,等自己去世後,拎出來陪葬,有尊嚴地落土。因此八友相信,捐出雀雀者肯定唔係唐人。今次受惠者乃白人,佢會唔會等到白人捐贈先至肯做手術?應該唔會,有人咁偉大肯捐寶貝出嚟,已經千恩萬謝,點到你揀話呢條唔要,嗰條唔要。求其有人肯捐,有得用,已經偷笑,仲理得係紅、黃、黑乎!又八友相信趙高、高力士、王振、魏忠賢、李蓮英等名監泉下有知,一定跳起擊棺而嘆:“若俺遲生千數百年,就唔駛假鳳虛凰、同宮女‘對食’咁淒涼矣!”

本文版权属“纽约侨报”所有,转载请注明“来源:纽约侨报”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版