您的位置: 首页/八友集/ 更好服務 火災大樓宜重建

更好服務 火災大樓宜重建

Jun 26, 2020, 22:35 PM

  日前出唐人街飛髮,喺擺也街一間相熟理髮廳搞定,出門後繞過茂比利街,但見五個月前被火燒剩半條人命嘅舊廿三小學校舍仍被木板圍封。聽講,市政府有意拆卸重建新式大樓。但有社區人士擔心到時變咗豪華大廈,政府食言,唔俾或諸多限制為人民服務嘅服務機構搬番入去,豈不大劑,因此極力反對。所以,保护下东城倡议计划将喺今(27)日喺哥伦布公园东北角举行示威。佢哋認為比利街70号大楼係华埠标誌性历史建筑,从最初作为公立第23小学校舍,再到后来逐渐转为社区使用空间,其重要性唔使多講,值得保留。

  23小學,即係依家嘅容閎小學,孔子大廈建成,23小學1978年搬過去新校舍,學校大樓就空置咗,市府於是俾社區服務團體使用,人力中心要咗四樓同五樓兩層,美東體育會要咗二樓第一間課室,啱啱成立嘅華埠歷史硏究(美洲華人博物館前身)用咗右邊兩間。國畫大師胡念祖則租用裏面兩間課室并打通成一間,半年後胡教授退出,陳學同舞蹈學院接手,最尾一間租戶為一所年青人舞獅團體所用。至於三樓,因人力中心申請咗一筆服務經費,乃成立青年中心,棣屬人力中心,1978年秋開始運作,主任為廖啓賢律師,共招請咗近30名職員,八友添為成員之一,其他有部份係“竹升”,暫時未搵到工作嘅大學生,更有兩個幇派嘅華青。於是,期間有明爭暗鬥,最終攤牌,由人力中心總監袁葆生出面調停。其他“純潔”職員事後得知原來槍戰一觸即發後,嚇到面青,有幾個即時辭職。三年後,經費用完,青年中心解散,人力中心再租用三樓。

  大火無情,一幢有歷史性之建築物危危乎,是推倒重建呢抑係內部整裝使用,有待專家評估。八友覺得,拆散重建較為妥當,新淨又現代化,但重點係必需白紙黑字,有幾層俾社區服務使用。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 网站地图| WAP版