您的位置: 首页/八友集/舉報有奬 國慶節煙花猖獗

舉報有奬 國慶節煙花猖獗

Jun 26, 2020, 00:02 AM

被困屋企幾個月,八友得咗失眠症,呢幾日好唔容易瞓得著,但到凌晨一兩點,就被放煙花嘅聲響驚醒,几分鐘之後,「夜鬼」將煙花放完,四周又恢復寧靜,但被嘈醒之後,邊有可能再瞓番著,輾轉反側,又到天光時刻。內心不禁咒罵:「又未到國慶,燒乜鬼煙花呢!」原來,投訴嘅唔單只八友,仲有好多俾放煙花激到「一佛出世,二佛升天」嘅市民大罵。據講,喺過去嘅幾個禮拜,布碌仑南部唔少居民被越来越多嘅燃放烟花搞到幾乎發癲。為此,当地民选官员呼吁民众打911報警或打311投诉。而市長白思豪早前宣布成立一個由多個機構組成嘅小組,打擊非法煙花爆竹販賣。

遙想25年前,紐約市喺獨立日前一個月,小意大利區以至華埠,特別係堅尼路繁忙地帶,意大利仔已叫賣煙火爆竹,聽講一個禮拜利潤高達1000蚊以上,因此,亦有華人、越裔加入販售行列。到1995年,時任市長朱利安尼眼見事態嚴重影響社會安寧及意外傷人事件,乃下令取締,檢獲危險物品無數。因為傷及非法售賣者利益,竟然有人大膽妄為,炸毀一部14座位警車示威,有說係黑手黨所為,但亦有人話係天殺幫所做。總之係激嬲警方,出動大規模掃蕩,卒之將違法賣煙火活動打殘。喺呢廿多年來,已經冇乜人夠膽以身試法,估唔到今年班友仔作反。

煙花爆竹乃危險物品,容易傷人,亦會反受其害,傷到自己。例如日前布朗市一幢公寓發生火警,經調查後係燃放煙火時波及所至。又警方表示,有極端惡作劇者將點著嘅煙火丟向睡眠嘅流浪漢。因此,警方已經放話嚴懲。讀者中有人想賺1000蚊嘅話不妨留意下,一經發現,立即舉報,好人好事,仲有錢賺,何樂而不為。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 网站地图| WAP版