您的位置: 首页/八友集/內外煎熬 中餐館難以為繼

內外煎熬 中餐館難以為繼

May 22, 2020, 00:09 AM

世上除咗有病態咁重複又重複,由朝鬧到晚嘅領導人唔好得罪之外,仲有一種人唔能夠得失,就係師。日前喺西安就發生一宗廚師不爽客人要求,竟然對菜肴洩憤,事情鬧大咗,上咗報紙新聞。原來,有個食客覺得有個菜味精同鹽都多咗,想點過另外一個菜。企枱好心,話廚師可以重新煮過。咁當然係好,點知新菜上枱,挾咗幾箸,竟然發現有菸頭在內。企枱連忙說可能係唔小心跌咗入去,可以再換。客人話有問題,要睇廚房監控錄影,發現有廚師冇戴口罩,向炒菜鑊吐口水。"咁仲得了,容乜易傳染新冠病毒。"客人大怒之下,向衛生部門同媒體投訴。

睇到呢件新聞,相信係人都會問「有冇搞錯。」因而對去餐館食飯有咗戒心。當然,上述係個別事件,絕大多數廚師都會遵守衛生條例,就算唔開心,都唔會糟撻食物,因為若果喺菜肴上加料,萬一俾食客發覺,搞大件事,餐館名譽掃地,只好關門大吉,老板破財,自己冇咗份工,何苦來哉!記得N年前,八友喺布碌侖做企枱,有個客點咗一味「豉椒炒蟹」,上桌後,佢一睇,都唔知點食好,話唔要,"喂!兄弟,你柯打嘅喎!"佢死都話退換。八友頂住條氣,擰番入廚房,大廚唔想得失客仔,唔收錢,煮過另外一個餐,八友條氣仍然唔順,但冇喺新菜做手腳。講真,有啲食客衰到爭唔落 。

仲記得十幾年前喺布碌侖有間中餐館,因收銀員同幾個黑人顧客為餐價問題出現茅盾,結果顧客居然發動擔牌示威,指餐館用老鼠肉作雞肉,係人都知玩嘢,老鼠肉點可能貴過雞肉,唔信可以去超市問下。但「嗜血」嘅11號電視台竟然日以繼夜作專題報導,立場唔使講,一定企喺示威者嗰一邊。唐餐館喺美國生存不易,已係不爭事實,疫情過後,又唔知有幾多間執笠矣!

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版