您的位置: 首页/八友集/ 鯊魚尅星 港人嗜喫真陰功

鯊魚尅星 港人嗜喫真陰功

May 19, 2020, 00:50 AM

讀者中喺呢幾年有冇食過魚翅?自從十幾年前美國為鯊魚請命,禁止喫魚翅後,海味店就唔見有魚翅出售,雖然曾經有人偷賣,但被人檢舉,結果「拉人封艇」,以後唔敢,以前經常話要用魚翅「哴口」嘅僑胞亦慢慢習慣,改喫魚肚羹。中國大陸有啲土豪,以為食魚翅係身份象徵,曾有一段時間,鯊魚遭殃。後來姚明擔任「保鯊大隊長」,提出環保救鯊魚,大陸開始禁止魚翅上桌,聽講頗有成效。不過,死性不改嘅係東南亞,特別係香港,全球超過四成魚翅貿易均由香港處理,根據香港政府統計處資料,跨境運輸魚翅分為四類:「空運」「陸運」「海運」及「其他」。過去多年,大多數魚翅產品經海路進入香港。2018年,八成七魚翅產品從海路進口。由此可見,船運公司喺鯊魚保育方面嘅影響力不容忽視。

就喺上個禮拜一,香港海關喺葵湧海關大樓驗貨場檢查兩個由厄瓜多爾進口貨櫃時,各檢獲約13噸懷疑受管制瀕危物種嘅乾魚翅,市值共約860萬元。漁護署專家估計近4萬瀕危鯊魚被宰殺。拒喫魚翅嘅友人大隻講大叫陰功,死咁多鯊魚,海洋仲使要嘅,想唔汚染都好難。佢話「鯊魚無罪,懷璧有罪」,如果有辦法改變身體構造,將翅收成一條線,就唔使慘成刀下亡魂矣!八友則認為罪在老饕,嗜喫魚翅者同鍾意食野味者都係一擔擔咁衰格。其實魚翅除咗蛋白質同脂肪之外,冇其他營養價值,況且鯊魚喺海洋中乜都落肚,魚翅有一定毒素,真係唔知食家貪魚翅乜好。八友又想起香港人有句俗話說「粉絲當作魚翅」。

香港以前街邊熟食小販攤檔有所謂「碗仔翅」出售,一個幾毫就有一碗,有人話係用粉絲做,但食落有好似魚翅。建議唐人街各大酒樓,疫情過後,不妨推出「斎碗仔翅」,等食家過下癮,唔好心思思破戒。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版