您的位置: 首页/八友集/大愛人間 州警口罩贈醫護

大愛人間 州警口罩贈醫護

Apr 2, 2020, 00:44 AM

  前日八友凌晨就寢時,收到萬有護理公司老總李生微訊,問需唔需要口罩,佢嗰度仲有啲,可以俾幾個八友應急。八友覆佢:兩個禮拜前已經封關,足不出戶,一直未用過口罩。自己舊年買嗰盒罩仍然未啓封,所以,先多謝佢嘅好意。

  古人說“雪中送炭”,喺口罩奇缺嘅今天,獲贈口罩,無疑係最佳禮物。睇美國中文電視一條視頻,喺明尼蘇達有個女醫生Janjua日前因為超速駕駛而被一個叫Schwartz州警攔下,Schwartz查過Janjua車牌後,提出警告:醫生超速係非常唔負責任嘅,尤其是因為一旦發生事故,不但佔用資源,而且亦冇能力幫助病人。女醫生嘆氣道歉並講聲謝謝時,接過州警遞俾佢嘅駕照,意外發現仲有5個N95口罩。霎時間Janjua明白過來,呢5個N95口罩,係來自州府提供俾前線警察保護設備供應。而Schwartz竟然轉送俾佢。呢一舉動令到Janjua喊咗出來,呢名州警似乎也有啲眼眶濕潤,並在寒風中祝福佢,“加油!”然後走開。人間有情,Janjua表示見到打敗病毒嘅希望。

  喺中國大陸疫情大爆發時,華僑華人紛紛向祖國捐贈口罩等抗疫物資。同樣,口依家美國災情嚴重,僑胞們亦大舉向有需要者捐罩、捐消毒物品,發揮互助精神。不過,有啲財迷心竅嘅人,居然囤積醫療物資,高價拋售。例如噚日布碌侖區有個中年男子費爾德海姆涉嫌囤積倒賣大宗醫療物資,並且向去佢屋企調查嘅FBI探員咳嗽,仲聲稱自己感染新冠病毒。聽講,嫌犯囤積嘅醫療物資,足足可以裝備一間醫院。呢個賤人已於30日被捕,控以攻擊聯邦官員、向執法部門作偽證等罪名,一旦罪成將面臨最高6年監禁及35萬元罰款。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版