您的位置: 首页/八友集/明智之舉 京奧延期明年辦

明智之舉 京奧延期明年辦

Mar 25, 2020, 02:21 AM

  “新冠病毒越演越烈,東京奧運究竟辦唔辦?”喺疫情風頭火勢嘅時候,全世界都關心呢項4年一度嘅體壇盛事。較早前,日本誓神劈願話7月嘅奧運會一定如期舉行,而且會辦得好完美。上個禮拜更擇好黃道吉日,喺雅典進行聖火傳遞儀式。無奈新冠肺炎疫情冇面俾,繼續肆虐,而距離東京奧運只有4個月時間,到奧運會開幕時,病毒係咪完全消失?機會好微,如果只係疫情受到控制,前景大好嘅話,則人們仍有被傳染嘅危險,故此,根本不可能舉行萬人聚會嘅大型體育比賽。        眼見日相安倍晉三仲係“口依口依哦哦”,唔肯表態,一啲體育強國乃進行“逼宮”;包括加拿大、澳洲、英國等宣佈日本如果唔將奧運會延期,佢哋退出今屆奧運會競賽。寫此文時,電視新聞正播放安倍晉三舉行記者會,表示已經同國際奧委會主席巴赫通過電話,彼此達成共識,將今年奧運會延期到明年夏天舉行。相信各國聽到呢個消息,亦會鬆口氣。因為人命可貴,而能夠參加奧運嘅運動員更係要用唔少金錢同心血去培養,安全係首要考慮。

  近年日本經濟不景,希望靠東京奧運會打翻身仗,可惜人算不如天算,俾新冠病毒壞咗好事。據知,日本曾經喺1964年主辦過奧運會,聖火傳遞途経香港,八友當年讀緊小學,曾經上街睇傳火熱鬧。其實,日本喺1940年亦有一次主辦奧運機會,但當時日本到處侵略,犯下滔天大罪,自知罪無可恕,唔會有國家同地區參加,乃宣佈退出。1940年係人禍,2020則係天災。衷心希望明年嘅奧運會能夠如願舉行。


本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版