您的位置: 首页/八友集/醫療不足 紐約人自行執生

醫療不足 紐約人自行執生

Mar 23, 2020, 01:04 AM

  “唔係咁唔好彩,中招係嘛!”4日前,八友落樓下洗衫房淸洗衣服,抽空到小花園練練太極,覺得唔對路,軟嚟嚟,有力不從心之感覺,心諗“好似係感冒,唔會係新冠口架!”洗完衫,呑咗兩粒泰龍諾,精神恢復好多。八女喺屋企做完工,出唐人街買食物,喫過晚飯後,八友開始發燒。八女大驚,擔心喺嗰隻嘢。八友自問好小心,每日勤洗手,出入嘅地方多係鄉親會,而近來到鄉親會娛樂嘅人最多係十個八個。“噢!何書記早個禮拜傷風感冒,莫非俾佢傳染咗?係就冇咁驚。”瞓覺前又食咗兩粒退消藥。第二朝醒來,昏昏沌沌,渾身冇力,食藥後喺廳睇電視,依照檢測新冠嘅程序做功課,包括深呼吸穀住度氣10秒,結果發覺冇呼吸困難嘅感覺,亦冇頭痛屙嘔病癥,心頭大石放落一半,乃繼續4個鐘頭食一次泰龍諾,禮拜六嗰日病情已好轉,最緊要嘅係冇新冠肺炎嘅病癓。

  執筆寫此文時,已經退燒,除咗覺得有啲攰之外,健康回復大半,再調理幾日,食啲好嘢補下身體,應該又係老虎可以打死幾隻。老實講,發病之初,真係好驚中招,因為美國喺呢方面嘅醫療水平嚴重不足。近日紐約疫情喺令人擔憂嘅;紐約全州新冠肺炎感染病例一日大增4812宗,總數達到1萬5168宗;其中死亡人數達到114人,超過華盛頓州成為全美最多。由於情況危急,州長葛謨呼籲聯邦政府立即動用“國防生產法”,直接向企業落命令根據需求生產口罩、呼吸機等醫療設備平抑價格,避免州與州之間打價格戰,唔使民眾高價購買。病毒會唔會喺4、5月回落?每個人都有此夢想。不過,市長白思豪就潑冷水,話唔會,佢向記者表示,4月會差過5月,因為醫療物資缺乏之故也。“政府拎嗮啲錢去發展國防,邊有錢去增強醫療設備呢!”八女說。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版