您的位置: 首页/八友集/ 香港派錢 移民有份惹議論

香港派錢 移民有份惹議論

Feb 28, 2020, 01:05 AM

  香港去年6月以來至今經歷咗黑衣暴徒暴亂及現今之新型冠狀病毒,真個是“唉吔吔,黃臺之家何堪再摘”。就喺呢個經濟艱難非常時期,香港特區政府終於緊急出手救命,財政司長陳茂波日前提出“財政預算案”,宣佈向18歲或以上嘅香港永久居民贈送港幣1萬銀,而且依照約十年前規矩,衹要有香港身份證,移咗民嘅人都有份。波叔話港府預計銀両惠及約700萬人,涉及約710億港元開支。特區政府會喺立法會撥款後,盡快公佈發放計劃詳情。此舉目的鼓勵帶動消費,紓緩市民之經濟壓力。此乃好事也。

  不過,睇電視新聞,有市民不滿政府連已經移民嘅前港人都有錢派:“佢哋已經唔係香港人,喺外國好食好住,冇理由分錢俾佢哋啫。”有市民發出怨言。波叔則表示如果唔俾埋已移民港人,計算方面好繁覆,會令到市民冇咁快有錢到手。況且,派錢係一次性,冇所謂啦!

  “八友,我同你哋幾個都有錢攞喎!”鄉親會嘅書記茂叔睇完新聞語八友:“上次派六千,今次派一萬,都唔錯啫!但點都唔及成哥,12月番澳門,跟住攞錢番來,年年有得攞,夠佢做麻雀本。”“我冇份攞。”八友搖頭說:“我都未換香港身份證。兩年前番香港先至的起心肝申請,至今仲係石沈大海。”“乜你好多錢咩!明知香港政府唔止派一次嘅嘛!”

  八友則認為,已經移民外國嘅港人,真係冇乜資格攞特區政府嘅錢,因為已經唔係定居香港,對香港已冇乜貢獻,何況呢個非常時期,需要錢嘅係香港普羅大眾,我哋何必分一杯羮呢!

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版