您的位置: 首页/八友集/唔順韓片 特朗普鬧荷里活

唔順韓片 特朗普鬧荷里活

Feb 25, 2020, 01:25 AM

  今年奧斯卡頒獎典禮雖然結束,但餘波盪漾,總統特朗普竟然踩過界,批評主辦單位冇鬼用,頒俾南韓電影《上流寄生族》四個獎項,其中包括“最佳電影”。佢日前喺科羅拉多州嘅集會上突然說:“今年奧斯卡真係一塌胡塗,得獎嘅居然係一部韓國電影。”特朗普非常不滿說:“真係唔明佢哋做乜嘢嘅。喺貿易方面,我哋同韓國問題已經夠多。荷裏活最後居然將年度最佳影片奬頒俾一部韓國。呢部片真係好出色咩!”原來,特朗普鍾意嘅係佢老母年代嘅電影如《亂世佳人》《紅樓金粉》等。不過,一九三九年嘅《亂世佳人》被批內容包含種族歧視。

  對特朗普冇乜好感嘅荷裏活演藝人員,都費事回應總統先生嘅問題,只係有人輕描淡寫說:“佢都未睇過呢部片。”言下之意係“你都未睇過,發乜噏風啫!”八友都覺得,特朗普不但八卦,管得太多,而且心胸狹窄,心中衹有“美國優先。美國偉大。”冇錯,美國係巴閉,但唔係樣樣都叻到飛起啩嘛!電影係一門藝術,電影發達嘅國家除佐美國、仲有英、法、中、韓、日、印等,佢哋都拍過唔少好嘅電影,好似“臥虎藏龍”,就蠃得最佳外語片,如果當年攞埋最佳電影奬,可能特朗普會喺賭場辦公室拍枱拍櫈大鬧“有冇搞Q錯。”身為一國之君,而且同韓國總統文在寅拍膊頭嘅美國總統,毫無量度,令人無語。不可不知,荷裏活嘅電影人,把關甚嚴,等閒嘅外語片衹能望奧斯卡大門興嘆。今年竟然奪得“最佳影片”大奬,自然有其過人之處。特朗普嘅批評,係咪侮辱咗佢哋嘅智慧呢?

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版