您的位置: 首页/八友集/ 春天將近 中餐業暫過寒冬

春天將近 中餐業暫過寒冬

Feb 11, 2020, 01:32 AM

  細侄菲立一家四口將喺呢個禮拜到倫敦旅遊探親,八友叫佢到當地唐人街幫襯兼打氣,因為聽說受新肺炎疫情影響之下,英國嘅中餐館生意跌咗一半以上。曾去過倫敦公幹訪友多次嘅菲立話一定,佢話倫敦華埠嘅唐餐仲好食過香港,每次到英倫,經常到唐人街開餐,“倫敦又唔係疫區,有乜好怕。”聽講,語不驚人死不休嘅外國媒體,唯恐天下不亂,紛紛加鹽加醋,誣衊唐人街唔乾淨,小心病毒傳播。好似倫敦華埠商會主席鄧柱廷就不滿當地媒體形容唐人街係“鬼城”,朝早拍攝尚未開市嘅唐人街,描寫“你睇,冇人敢到唐人街咯!”,用心之惡毒,可想而知。

  除咗英國,其他地方如加拿大、意大利、葡萄牙等亦有類似情況出現:“喂!你哋有冇蝙蝠湯賣?”“你哋嘅餐飲有冇病毒?”

  我哋身處嘅唐人街亦唔可以獨善其身,好明顯,遊人減少咗,往年嘅新春花車遊行,十幾二十萬遊客逼爆華埠,插針都插唔入,但今年就冇咁嘅盛況矣!八友好多時朝早都到華埠某大酒樓飲茶,11點後,一定要排隊,但最近,12點去都仲有位。經理說,有啲僑胞免不過都唔出來飲茶啦!聽美國華人餐飲業協會會長陳鍵榕講,最近係中餐業嘅寒冬,唔少訂咗春宴嘅社團商號都打退堂鼓,某大酒樓有過千圍預訂已經取消,小型餐廳生意亦都清淡咗唔少,又話如果再拖幾個月,恐怕佢哋冇錢交租。元宵節嗰日,新州市前副市長黎海倫一如往年,喺金豐酒樓設春茗,宴請新州市政府官員及教育界人士,亦有僑界人士赴會,少不免搵埋八友醒獅功夫助慶,語佢:“以為你會取消今年派對!”“點會呢!呢度咁安全,千祈唔好俾謠言嚇親。你睇,今年參加嘅人仲多過舊年。”呢個寒冷,祈望盡快過去。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版