您的位置: 首页/八友集/伊朗失敗 打飛機罪無可恕

伊朗失敗 打飛機罪無可恕

Jan 14, 2020, 01:41 AM

  “不認,不認,還需認。”喺鐵證如山下,伊朗政府上個禮拜六改口承認發射導彈錯誤擊落烏克蘭客機。認錯之後,首都德黑蘭及國內其他城市連續兩三日有民眾上街參加反政府示威,抗議政府之前講大話掩蓋客機被擊落真相,要求最高領導人哈梅內伊落臺。下令斬首伊朗第二號人物蘇萊曼尼而受到批評嘅美國總統特朗普相信有一身鬆之感覺,第一時間發推文,表示密切注視事態發展,又警告伊朗政府“唔好再屠殺和平示威者,全世界都係度睇住”。

  打飛機係不可饒恕嘅行為,何況打落嘅係民航機,家科技發達,無理由唔知飛緊嘅嗰舊物體係乜,連咁簡單嘅科技都蒙查查,伊朗點同美國叫陣?失敗。講起民航機被擊落,最慘嘅事件發生喺1981年,一架載住兩百幾人,由紐約飛出嘅大韓客機,喺阿拉斯加稍停後再起飛冇耐,竟然被當時嘅蘇聯政府軍方打咗落來,二百幾人,渣到冇。呢架飛機之中約有20個華人,佢哋嘅家屬曾前往中華公所求助,後來又到聯合國附近向蘇聯駐美辦事處抗議。蘇聯辯稱嗰架唔知係乜物體飛越國家領空小小,警告無效後唯有擊落。此語一出,全世界嘩然,蘇聯科技唔敢認第一,起碼都第二,居然可以唔知嗰架係民航機,開玩笑咩!

  伊朗今次重演空難,罪無可恕,哈梅內伊何不順應民意落臺,以平民憤?伊朗,古稱波斯,八友對呢個國家頗為響往,原因係“倚天屠龍記”中描寫明教源自波斯,“紫衫龍王”同小昭母女鬼火咁靚。

  故此有想到波斯旅遊之想法,口依家當然唔敢去了。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版