您的位置: 首页/八友集/流年不利 特朗普要打小人

流年不利 特朗普要打小人

Dec 7, 2019, 01:42 AM

  美國總統特朗普最近黑過“墨鬥”;喺國內受到民主黨大佬們聲討,準備對佢進行彈劾,而係國外,同中國、阿根廷、巴西嘅貿易戰打得唔係好順利,本來以為到倫敦參加北約峰會,同班可能係志同道合各國話事人摸下酒杯底,傾訴下心中情。點知呢班友仔喺背後嘲笑佢、奚落佢,咁樣背後插刀,仲慘過當面鬧佢。難怪特朗普嬲到拂袖而去,大駡個幾個友仔係“雙面人”。

  原來,幾日前一眾北約成員國嘅領導人喺英國舉行峰會,喺一次晚餐會前鳮尾酒會上,加拿大總理杜魯多、英國首相約翰遜、法國總統馬克龍等幾個麻甩佬圍埋吹水,言談間被拍攝到好似將特朗普作取笑話題。拍攝嘅係加拿大廣播公司,將八卦畫面拍咗落來,之後配上字幕並上傳至網路。影片顯示,英國安妮公主同荷蘭總理呂特亦喺三個男生旁邊,約翰遜問馬克龍:“呢啲係你遲到嘅原因?”杜魯多插嘴:“佢會遲到,因為佢又另外舉行了咗一個40分鐘記者會。我睇到佢嘅團隊難以相信神情得連下巴都跌落地上。”雖然未知杜魯多講嘅係邊個,係弦外之音,係人都知道係諷刺特朗普用咗好多時間喺記者會上。

  聽講,特朗普知道呢個事後,嬲到幾乎食唔落牛扒,本來仲有一個記者會都唔開,匆匆坐“空軍一號”番華盛頓去。有人擔心英國、法國同加拿大日子唔好過。因為特朗普係個恩怨分明嘅鐵血男兒,有恩必報,有仇必懲,佢會唔會係飛返美國途中拍枱拍櫈:“我唔叫你哋加關稅、加軍費,我就唔姓特。”建議總統先生唔駛咁勞氣,新年將至,流年不利,犯小人而已。建議到香港灣仔天橋底搵個神婆同你打小人,打完之後,包保閣下乜事都冇。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版