您的位置: 首页/八友集/囂張打劫 唔蒙面即時被捕

囂張打劫 唔蒙面即時被捕

Dec 2, 2019, 01:30 AM

  好耐未出現(或出現過而冇報警)嘅賭檔劫案喺感恩節當日喺唐人街上演,喺裏面想發小財之賭客尚未感恩已先破財。據《僑報》報導,被劫嘅賭檔位於喜士達街夾愛烈治街嘅“長安娛樂場肥妹同學會”(乍看名字,以為係色情場所)。被劫之前,先有熟客某君喺賭場內賭錢,然後有3名男子拍門要入去,某君向看門人說“係我呀哥,俾佢入來啦!”於是放咗三個持槍摣刀嘅劫賊入屋,喺武器威脅下,賭場內20多個賭客唯有將財物現金奉上。為首之歹徒更囂張表示“阿叔行走江湖幾十年都未俾公安拉過。”嘩!真係串得交關,以前閣下有公安作保護傘,可以冇事,呢度係花旗,搵邊個保護呀!呢幾個儍賊,面都唔識得蒙,學下香港黑衣暴徒先至打劫呀嘛!否則唔會咁快就被警察拉咗。

  “睇到呢單新聞,就想起幾十年前喺賭搏館做打荷嘅歲月。”年逾70嘅林叔說,當年唐人街賭檔林立,引起華青幫派垂涎,時不時前往打劫。“每間賭檔都有“天文臺”(看門人),咁都放佢哋入來?”“唉!賭檔打開門做生意,好多時防不勝防?”林叔說,“有次被劫,其中有個打荷朱仔略為反抗,就被槍柄打崩頭流血。有個老叔父,戴咗隻玉戒指幾十年,俾華青多謝都冇聲,搶咗去,幾乎激到心臟病發。佢話當年嘅“土庫底”幾乎間間都被打劫過,劫匪大多冇蒙面,當年未有閉路電視,所以好難破案。”口依家科技咁發達,就算蒙咗面,都可以識別得出來,做笨賊,幾難走得甩。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版