您的位置: 首页/八友集/攔搜有錯 選總統彭博認衰

攔搜有錯 選總統彭博認衰

Nov 19, 2019, 01:12 AM

  “知錯能改,善莫大焉”。已經報名參加總統大選嘅前紐約市長彭博,日前喺紐約某非裔教堂參加一項活動時,幾乎流下男兒淚,批評自己大錯特錯:“攔截搜身呢項執法行為經常導致唔成比例拘留非裔同拉美裔,但我當年竟然支持此法例,真係唔應該,對唔住。”有人指此乃遲來嘅道歉。但大多數人話彭博Sorry非真心,要講嘅話,卸任時已經要講,等到想做總統時先至懺悔,擺明係想黑人同呂宋人投票支持佢當最高領導人。

  其實又唔怪得彭博善變,因為政客就係“變色龍”,何況係有錢嘅政治人。聽講,“唔嫁又嫁”嘅彭博食言競選總統,係“因為睇到民主黨參選人中冇人可以打敗特朗普,所以只好自己出馬。”咁佢有冇機會獲得黨內提名?得到之後能否擊退特朗普(假設特朗普彈劾甩身)?實乃未知之數。俗語說“金錢非萬能,但冇錢就萬萬不能。”想當年,彭博做咗8年市長後,仲未頂癮,於是提案佢呢屆可以再增4年,為此,佢丟咗1個億打廣告,鼓吹自己政績,表明“再借四個春夏秋冬,包保大蘋果爽脆又好味。”結果又真係俾佢得咗,帶契埋陳倩雯、顧雅明等同屆官員玩多四載。

  所以,估計彭博又再動用銀彈政策,為自己樹立形象,首要嘅係將自己從政期間嘅瑕疵洗乾淨,必要時放下身段講句“對唔住,我錯咗。”“攔截搜身”就係例子。據知,佢準備丟一億元喺較多支持特朗普嘅4個州市打廣告。當然,一個億就想做老總係唔夠,要競逐白宮寶座,起碼十億八億打知名度,以彭博身家來講,小菜一碟而已。“佢77歲囉喎!身體頂唔頂得住呀!”大隻講有此疑問。八友都有此顧慮,但睇番民調排喺前面嘅拜登、桑德斯,邊個唔係七十有幾,老桑啱啱做咗心臟手術,老拜冇記性,經常重覆講過嘅嘢。所以,老彭嘅健康應該唔成問題也。讀者點睇。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版