您的位置: 首页/八友集/公民權利 拒當陪審員有罪

公民權利 拒當陪審員有罪

Nov 15, 2019, 01:54 AM

  讀者中有幾多人接過做陪審員通知書而去法庭報到?被選中後有冇出席?又或者有冇人對通知書理都唔理?記得,如果唔去報到又唔向法庭陳述理由,有可能坐監也。“唔係啩,咁嚴重?”最近,喺佛羅里達州嘅後生仔Somerville喺一次民事審判中,被選為陪審員,但佢喺開庭嗰日竟然瞓過龍冇出庭;巡迴法官直接以藐視法庭判處刑事罪名,判佢坐監10日、一年緩刑,仲要做150個小時社區服務、罰款223元,並寫一封至少100字嘅道歉信。

  呢個事件講俾我哋知,官府嘅事情,絕對唔能夠怠慢,否則自己攞來衰。

  當陪審員,好多人都唔想做,但收到通知書之後,一定要回覆,被抽中後,必須出席,閣下工作嘅公司老板,唔准唔可以,否則佢都要受罰。假如閣下做嘅係一單驚天大案,之後就會受到傳媒追訪,成為新聞人物。八友有個朋友老李,1986年就入選霍華海灘歧視案陪審員,所有陪審員同宿同吃同打機,總之唔得回家,辛苦咗好幾日,單案審結,先至暫且如負重釋,因為仲有大把記者提問“點解你投咁嘅票?”

  八友1987年亦接過做陪審員通知書,因為以前已用各種理由唔去,知道再推,可能對自己不利,只好前往報到,好似去咗三日,可能見八友英文水平差,話“唔駛嘞!”其後仲收到政府俾嘅幾十蚊車馬費。直到1993年,再接通知書,又係如此這般甩身。2018年,法庭又叫八友去報到,聽“主考官”講到“有英文障礙者去某某法院大樓地下某室解釋。”二話不問,立即前往,同小吏傾咗一輪,佢話“你嘅英文都OK喎!”“阿姐,普通英文我冇問題,但不足以應付案件也,你都唔想有寃假錯案啫!”又甩身。唔想做陪審員嘅朋友,千祈唔好以“我唔識英文”為理由,否則自招苦吃。


本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版