您的位置: 首页/八友集/斷送前程 窩邊草偷吃不得

斷送前程 窩邊草偷吃不得

Nov 8, 2019, 00:56 AM

  “明知故犯,係咪抵死?”連鎖快餐麥記集團CEO依斯達布諾(Easterbrook)由於違反集團規定同女性下屬發生性關係,勞資兩方喺雙方協議下,當事人宣布自己炒自己魷魚。麥記董事會表示經過明查暗訪,發現依斯達布諾同一名員工發生兩情相悅關係,雖然你情我願,打死無怨,但依然違反公司政策,呢個人“咁冇腦”,留之無用,故此叫佢番屋企瞓覺算嘞!

  原來,根據麥記政策,管理層人員唔可以同直屬或非直屬員工發生暧味關係。依斯達布諾則向公司員工發電郵講Sorry,承認自己違反公司政策,又話自己擔任CEO期間,得到大家支持,做得好開心,但考慮到公司嘅政策,佢同意董事局嘅決定,自己執嘢走人。

  能夠做到連鎖快餐店龍頭嘅CEO,依斯達布諾當然唔係少嘢,聽講,喺佢揸弗期間,將餐點推陳出新,制定政策,令到業績節節攀升,備受公司器重,風頭一時無兩。不過,佢應該知道公司唔准食“窩邊草”嘅規矩,但佢居然“明知山有虎,偏向虎山行”,係咪特寵生嬌,以為公司唔敢喐佢?抑係搵到真心知己,“不愛江山愛美人”?不得而知。不過,大集團嘅規則不可能為某一個人而破,否則焉能服眾,只好“揮淚斬謖”,高。

  講起吃“窩邊草”,八友50年來工作中,亦見過好幾次,如果係未婚男女,拍下拖,仲勉強可以,否則會影響工作,影響公司形象,不可為也。


本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版