您的位置: 首页/八友集/ 勿貪過癮 預防性病靠個袋

勿貪過癮 預防性病靠個袋

Nov 6, 2019, 00:54 AM

  八友日前到藥房買藥,前面一個男人正在買安全袋,12蚊一打,男人頗為嫌貴,藥劑師說:“今次來貨貴咗啲,其實都唔貴嘞!咁多年都冇起過價。”“好啦!俾夠兩打我,費事遲下又加價。”八友買完藥之後,藥劑師問:“要唔要袋?”“唔要咯!咁貴。”八友笑曰。“我係問你駛唔駛用袋裝起啲藥。”藥劑師亦大笑。

  講起安全避孕袋,據一份最新報告指出,市府派發嘅免費袋正在減少。市管理報告顯示,截至6月30日的2019財年內,市衛生局合共派發1900萬個男用安全袋,低過舊年2090萬個及2015年嘅3660萬個。點解免費袋數量會縮水,原來又同總統特朗普有關,因為聯邦政府削減咗有關經費,“減幅係由於安全袋訂單延誤及傳統性安全產品嘅聯邦資助金額減少。”奇怪嘅係,雖然派發安全袋減少,但紐約市嘅性傳播疾病感染率不升反跌,去年愛滋病新診斷個案減少19.2%、梅毒病例減少2.9%。

  相信好多僑胞都唔知市府有免費安全袋派發,有需要者不妨向華策劃會查詢,因多年前華策會愛滋病防預中心曾經喺勿街向民眾派安全袋,八友採訪完之後,對方仲送咗一盒安全袋俾八友使用或留念。八友曾去過該中心幾次新聞發佈會,感覺佢哋做得唔錯。記得有次佢哋講,有啲新移民尋花問柳打唔怕死真軍,結果染咗愛滋,同老婆行房時又唔戴袋,連累枕邊人都中招。

  “我哋需要向新移民多做思想工作。”愛滋病目前雖係絕症,卻不一定要人命,因為有何大一嘅“鳮尾酒療法”續命。總之,尋歡作樂時,為安全計,有安全袋幫到你。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版