您的位置: 首页/八友集/ 敲響警鐘 流浪漢血洗華埠

敲響警鐘 流浪漢血洗華埠

Oct 7, 2019, 01:15 AM

  “唐人街嘅流浪漢越來越多,佢哋時不時有爭執,甚至打架。咁樣搞落去,遲早出事。”年前曾經聽一個“黃衫軍”清潔華埠員工咁講。果然不幸言中,日前紐約唐人街就發生一單恐怖襲擊事件,5個流浪漢被一個後生流浪漢用鐵器狂毆,4死1重傷,其中有一個係年近80嘅華人亦慘遭不幸。呢個老翁,八友三年前報導華埠流浪漢問題時曾拍過張佢行乞照片:坐喺包厘夾披露街交界處一石級,左手揸住個乞錢膠杯,右手拎菸,旁邊一座放滿佢家當嘅手推車。同事噚日採訪時曾拎呢張照片俾警察辨識,差佬只係話“有啲似又唔係好似。”唔敢肯定。其實,案發嗰一區只有一個唐人流浪漢,唔係佢,難道有別人?

  唐人街有幾多流浪漢?暫時睇唔到統計數字,八友估計喺20到30個,聚居地點喺林則徐廣場,因為呢處有多張石櫈木椅,入夜之後,遊人散去,就成為佢哋嘅世界;“天為蘿帳地為氈,日月星辰伴我眠。”朱元璋呢首詩,亦為流浪漢寫照。而係日頭,佢哋席地行乞,或係垃圾桶搵嘢食,但亦有人唔想不勞而獲,企喺一啲餐館門口為顧客拉門,希望得到銅板或鈔票打賞,八友都俾過幾次。曾經見過兩個流浪漢喺且林士果一間好生意嘅餐館為爭拉門而打鬥,甚至出刀仔,幸警方及對趕到,逮捕持武器人士。

  大家有冇發覺,紐約流浪漢以前冇咁多,只不個過白思豪出任市長後,流浪漢先至不斷增加。統計數字顯示,現時“大蘋果”街頭約有浪民3500人,又收容所住咗6萬人。報導話白思豪聞報華埠血案後表示震驚,會嚴粛跟進喎!唉!只要佢多啲時間喺紐約市處理政務,納忠言,行仁政,“大蘋果”先至有望回恢正軌。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版