您的位置: 首页/八友集/貼錢冇計 湊孫最怕媳囉蘇

貼錢冇計 湊孫最怕媳囉蘇

July 10, 2019, 02:37 AM

  呢個多月,八友肯定少打好多麻雀,因為孫仔女放暑假,八友要負起湊嘅責任。八仔說,佢盡可能申請喺屋企上班,到時可以一邊做工一邊湊小朋友,否則就要老爸幫手。禮拜一嗰日,八仔帶小朋友到華埠,放低孫仔後先番工。孫仔好聽話,只要有卡通睇,乜都冇所謂。有時自己想睇下新聞,佢就同爺爺搶遙控器。吃過午餐後,連午睡都唔肯,盯住卡通片欣賞。4點半後,八仔收工,先將小朋友帶番皇后區。八友則到外邊透透氣,自然而然又走上會所,見仲有一台麻雀高手大戰,於是坐低學下人哋啲牌張。

  四圏打完之後,四大高手上洗手間,“乜口依家先上嚟呀!佢哋啱啱打完12圏,走咗囉!”基哥問。“要湊孫吖嘛!呢個幾月都會係咁。”湊孫唔係唔好,但如果遇到醃尖聲悶嘅兒女、媳婦或女婿,真係條氣會頂到上心口口架。”基哥說,“佢有個妹,同個仔湊一對孫仔、孫女番學放學,有時會在喺個廳睇下電視,等兒媳放工先番屋企,點知媳婦竟然黑起口面,責怪佢開電視嗮電。”我聽到後,鬧阿妹攞苦來辛,媳婦當你係工人咋!“仲幫湊,係我就費事啋佢,等佢用錢請人做阿四啦!”芬姐亦有同感,佢話有啲人身在福中不知福,請人湊小朋友,每個月起碼兩千銀,難得自己父母肯幫忙,真係求神拜佛。如果仲嫌三嫌四,自己攞嚟衰。

  麻雀腳中有一對夫婦春節後亦到好唔得閒,因為平日要湊孫放學,而外孫女又出世,於是又要幫手。佢哋只能禮拜尾偷閒打下麻雀,平日抽空到會所聞下麻雀味都好。有人笑佢:“仔女有冇俾番錢你呀?”“自己仔孫,計得咁多咩!”另一位朱哥則表示,自己兩公婆咁辛苦帶大三個仔女,難得甩身,退休後仲要佢湊孫?做人仲有乜意義,咪搞。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版