您的位置: 首页/八友集/兩橋豪宅 官商勾結苦貧民

兩橋豪宅 官商勾結苦貧民

July 9, 2019, 01:57 AM

  住喺八友樓上嘅華仔問係咪南街286號兩橋區政府樓發生打劫案?八友話冇錯,聽講住戶有個80歲唐人阿伯俾一個黑人同一名呂宋仔賺門入屋,整傷阿伯後,翻箱倒櫃,拎走咗成4千銀。“乜阿伯放咁多錢喺屋企?”華仔說,兩橋區早年真係盜賊如毛,打搶、強暴,開槍,幾乎乜罪案都有,但隨著呢區漸漸被市政府視為有發財可能嘅中上住宅區之後,加強警力巡邏,治安大大改善,較大罪案已經好少發生,乜今次賊人咁大膽。八友話案發嗰間大廈係政府樓,大堂冇保安,當然係差啲。當然,雖然我哋住呢處有警衛,陌生人入來要簽名,但預防突發,都要打醒十二份精神。

  講起兩橋區安全指數,1980年代之前,有紅蕃區之稱,該區位於羅格斯街至克林頓街之間嘅車厘街、南街一帶,對面東河,靚景也,但附近有多座政府大廈,大家都知道,凡係政府樓宇,由於品流複雜,治安稍差,頂多係偷搶、販毒、強奸、殺人而已。八友曾經試過大白天番屋企時經過,見到警察圍捕殺人毒販。八友1979牟搬入兩橋大廈,夜晚放工時行過,真係步步警心,自求多福,好彩總算平安渡過,衹有1990年某夜行入羅挌斯街政府樓時,被三個黑小子意圖箍頸搶劫,當時唔知死,恃住食過夜粥,同對方鬥過,僥倖冇事。又住喺樓下嘅前中華公所主席陳兆堂,有晚經過政府樓,不幸被打劫,連自己有牌手槍,亦被搶走。9/11事件後幾年,市府睇到兩橋區發展潛力大,可以貴族化之,桑迪大風災後,“皮膚嘜”超市唔做,賣咗俾一個大地產商(聽說係特朗普),依家興建緊80層豪宅,最平一個統倉都要百萬銀喎。近年又話要再建多幾座豪廈,政府當然歡迎,但貧下中農如八友等住戶,恐怕難逃被逼遷嘅命運矣!

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版