您的位置: 首页/八友集/義之所在 阿倫撐警未驚過

義之所在 阿倫撐警未驚過

July 8, 2019, 01:44 AM

  睇到《僑報》嘅廣告,先知“校長”譚詠倫將喺下個月中來大西洋賭城開唱。阿倫好多年冇嚟美東開演唱會,最近佢譽滿香江,相信8月賭城個唱一定爆滿。點解話“校長”近來出名呢,因為佢同鍾鎮濤、梁家輝、陳欣健等明星參加咗“630撐警察,保法治,護安寧”集會。阿倫上臺講話時話唔想談政治,但指出情況再咁落去,香港就冇得救,無人管治到香港。又話世界其他地方嘅暴動更加血腥,但希望家和萬事興,大家都要為香港未來好。“阿Sir、Madam,辛苦曬,我哋絕對撐你。”撐完警後,示威者點會放過“校長”,不但網上圍攻,又有人踩爛佢嘅黑膠唱片,又要求台灣金馬奬取消阿倫影帝名銜。相信譚詠倫已經預咗係咁,但“義之所在,雖千萬人,吾往矣!”仲有乜好怕。

  八友採訪過唔少港台演藝明星,阿倫喺最親切友善者之一,聽講酒店嘅阿嬸,佢都會親切打招呼。1980年,仲未係校長嘅譚詠倫憑“假如我是真的”一片,加上政治因素獲得台灣金馬奬最佳男主角奬。剛營業嘅大西洋城某賭場乃邀請阿倫前來演出。1981年春節前幾日,佢帶同溫拿兩虎飛抵紐約,仲未休息好,主辦方已搵記者到酒店採訪。佢又真係一啲架子都冇,有問必答,又叫記者記得入賭城捧場。可惜,佢兩場騷未能全滿,不過之後十幾年,佢大紅大紫,再在賭城登臺時,已經座無虛設。喺歌唱界,佢同張國榮係瑜亮之爭。依家香港,實力派歌手凋零,阿倫係存在少數者之一。年年話自己25歲嘅阿倫近幾年已較少開騷,今次難得再赴賭城,倫粉有福矣!

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版