您的位置: 首页/八友集/熱到火燒 暑假不宜亞洲遊

熱到火燒 暑假不宜亞洲遊

Jun 11, 2019, 01:42 AM

  今年初退休嘅球哥月前同家人到東南亞旅遊,歸來後話頂唔順當地嘅熱浪:“日日都熱到飛起,90度氣溫有起冇落,去到觀光區,落車睇幾睇就幾乎透唔到氣,嗱嗱聲上番車。”“下次揀冷天去囉!”“冇用,東南亞一年四季都咁熱,下次去南極或者北極。”球哥可能唔知,由於地球暖化,南北極融冰,已經威脅到動物如熊嘅生存。日前閱報得知,今年為止地球暖化最大受害國乃係印度,近幾日氣溫高達122度,炎熱高溫不只人類受不了,亦對動物造成傷害,中部馬德雅省一處森林就有15隻馬騮疑似中暑死亡。政府擔心有老虎為咗尋找水源,可能會闖入民居,吁民眾小心。可以說,現階段不宜到印度旅遊,因為除咗擔憂強奸之外,仲怕會變“幹蒸燒賣”。

  住慣冷天多過熱天嘅人,係唔適合喺夏天期間到熱帶,甚至亞熱帶地區旅行,八友十多年前9月初曾到台灣訪友,就熱到幾乎中暑,此後若果去香港、廣東探親,一定避開6至9月,以策安全。八友多事,每有親友准備暑假帶仔女番大陸港台探親遊學時,總會提醒:“機票咁貴,天氣酷熱,好容易熱親小朋友?!”“我知,但小朋友只係得暑假長假,冇法啦!唯有小心啲。”舊年八仔一家四口喺3月底復活節春假一個多星期假期去香港同台灣探親,八友作陪,當時天氣最好,唔冷唔熱。今年暑假,八媳原想7月再到台灣探父母,但親家表示,台灣嘅熱天唔係人咁品,熱起上來,台灣人都頂唔順。八媳乃打消行程,考慮聖誕一個禮拜短假先帶仔女返臺。“坐飛機都去咗兩天啦!”八友說。“有乜辦法。”唔少人認為冷天好過熱天,八友亦有同感,冷天有衣服保暖,熱天則熱到剝層皮都搞唔定。“地球暖化幾時休?”

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版