您的位置: 首页/八友集/民食為天 廚藝節目受歡迎

民食為天 廚藝節目受歡迎

Jun 10, 2019, 01:23 AM

  讀者有冇發覺,依家嘅電視頻道有唔少美食節目,美國中文電視有自己製作之“亞洲美食”,由中西兩位靚女主持,佢哋由幾年前嘅趙飛燕變成現時嘅楊玉環,此乃美食之功。香港TVB有多個美食節目,邀演藝人士如“肥媽”、“煒哥”主持,而最成功嘅係李家鼎之“阿爺廚房”,原來鼎爺不但功夫犀利,又自小喺廚房浸婬,練得一手好廚功,節目一出,立即爆紅,臨老喫尾糊。而喺美國,電視美食節目更多,幾個節目主持人更係威名遠播,財源滾滾。呢一兩年,更有“少年廚神”節目推出,由少兒出場烹調美食,亦吸引觀眾欣賞。

  《僑報》日前有一個專版介紹少兒廚神;12歲嘅小學生小胖癡迷廚藝,連續3年每天放學回家作業唔係做功課而係煮飯,手藝比媽咪仲要好好多。不過,佢讀書就認真馬馬虎虎矣。又有個加州男孩Flynn,10歲時再忍受唔到佢老媽子煮嘅餐,自己親自下廚,居然食到屋企人嘴?佢父母靈機一動,將家居作私房菜,亦座無虛席,一年之後,Flynn已經擁有自己嘅餐館。

  八友有個學生艾力對Flynn少年得志,羨慕不已之餘亦有啲自怨自艾。艾力初中時跟隨八友學武時已愛上煮食,有時仲自己搞定家人晚飯,佢不停鉆研廚藝,暑假時更係唐人街名店做打雜偷師,大學畢業後又到法式廚藝學校進修,可以講中西美食,件件皆能。後來佢老爸打本俾佢喺蘇豪區附近開餐廳,為咗慳錢,自己“一腳踢”做嗮,可惜一直做唔起,黯然關門,再次打工。艾力上過美食節目,廚藝又受顧客歡迎,但自己做老闆點解唔掂呢?八友話佢仲後生,大把機會,謀定而後動囉!

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版