您的位置: 首页/八友集/敂勞難報 願天下媽咪快樂

敂勞難報 願天下媽咪快樂

May 11, 2019, 01:42 AM

  華埠街頭遇見師公工商總會書記阿林,語八友:“今個禮拜母親節,會所有布斐餐會慶祝,上嚟食餐順便同你打番場十二圈啦!”有得食又“有錢收”,當然一囗答應。師公會每逢大節日都有布斐餐招呼會員雀友,難得。講起母親節,讀者預備好同自己媽咪,自己個仔嘅媽咪慶祝未?尚未打電話去餐館訂位嘅試下立即致電,可能仲有枱都未定,梗有一間有枱嘅。早兩個禮拜八仔已吩咐喺間相熟嘅酒樓卜位,經理輝哥一睇訂位簿:“你好彩,呢個時間啱啱有張枱。”兩年前,八友一家人興高彩烈慶祝“媽打日”,八妻走咗之後,去年嘅節日,已経冇心思聚餐矣!八女孝心,呢兩年都訂咗鮮花放喺媽咪墳前致意。

  親恩係偉大嘅,特別係母親之恩:“生我、長我、育我”,媽咪喺身邊時或者唔覺得點,但當媽咪永遠離開後,先至會感到親恩之可貴。八友1974年1月16日喺香港啓德機場揮別體弱多病嘅年邁母親,移民美國,點知竟成永訣。半年後,老母病逝,而自己卻未能送終,成為八友一生最痛。

  喺美國,“媽打日”最鬱悶嘅係做餐館工作嘅人,因為呢日係全家一齊聚餐嘅節日,睇住人哋一家大細喫餐,自己就搏嗮老命做嘢。八友早年喺專做老番生意嘅中餐館做企枱,母親節要提早一粒鐘到餐館准備後勤工作。未開門,顧客已開始排隊,一直忙到收工,做到腰骨都直。最激氣喺遇到“知慳識儉”嘅客人,一家大細十幾人食完餐,放低兩蚊小費走人。離開餐館行業40年,有時都頗為懷念那些年打併日子,特別係“媽打日”做到身水身汗嘅複雜心情。願天下媽咪快樂。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版