您的位置: 首页/八友集/全美警報 十八女殺手出監

全美警報 十八女殺手出監

Apr 15, 2019, 01:32 AM

  有人話美國法律係對兇徒仁慈,對受害人殘忍。唔知大家有冇意見,反正八友就信。嗱!最近就有一個窮兇極惡,特別令婦女膽顫心驚嘅邪魔喺伊利諾州被放出監,不但芝加哥人嚇到有得震冇得瞓,就連全美國嘅女人都會極度擔心,唔敢出街。“有冇咁誇張呀!”友人大隻講唔信。大隻講太年輕囉!且聽八友慢慢道來。

  喺1980年代,伊利諾州有個邪教組織叫做“開膛四人組”(Ripper Crew),其中一個叫高科裏斯(Kokoraleis)嘅變態“女殺手”同另外三個人喺芝加哥一帶殺害18個女人,控綁架、折磨、肢解等多項罪名,罪成後被判終身監禁,點知上兩個禮拜獲釋出獄。點解會放佢嘅呢?原來,佢係根據多年前達成嘅上訴協議,可以獲釋出獄。“丟!呢啲係乜法律呀!呢種惡魔,死一百次都難還死者一個公道,居然可以放監,我哋啲平民百姓點算?俾佢害死嘅人真係死都唔眼閉囉!”受害者家屬群情激憤,猛批執法者。“大隻講,你話美國法律係咪對好人殘忍?”

  聽講,伊州受害者通知系統已發出變態殺人魔出獄警報。佢住喺邊度仲未知,會唔會住喺芝加哥?唔知,亦有可能覺得芝城太冷,搬去拉斯維加斯,甚至鐘意紐約呢個大都會,搬到大蘋果,都有可能。無論佢搬到哪裏,哪裏就草木皆兵。有社區人士說,殺死18個女人,唔係18隻烏蠅,竟然可以話放就放,做佢鄰居嘅人豈不是好慘?有關當局應該有一套相應辦法釋除民眾疑慮,例如戴電子腳鐐,將Ripper Crew紋喺佢額頭等,總之,衹要佢一出現,每個人都知佢係乜誰,離佢越遠越好。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版