您的位置: 首页/八友集/迎新留舊 會所維繫鄉親情

迎新留舊 會所維繫鄉親情

Apr 13, 2019, 01:46 AM

  禮拜四嗰日中午12點上到客家會所,但見麻雀櫈空空如也,往日早已坐上兩枱戰友攻打四方城,今日除咗總務基哥之外,就只有兩個等開檯嘅老人家睇下電視又睇下報紙。忠哥看到八友坐低,說:“今日都唔知有冇腳開枱。唉!會所越來越人少,都唔知幾時閂門執笠囉!”清理緊麻雀枱嘅基哥不以為然:“你都多餘嚟講嘅,傳統會所都有執笠?幾乎都有自己物業嘛!仲有啲會員支撐,又有新人入會,咁點會閂門呢!我哋幾個枱柱禮拜二嗰日番咗香港、大陸,又有兩個過埠探親,呢兩日先少咗人之嘛!等多半粒鐘就有人上嚟啦!你係元老,好望會所執笠咩!”

  八友認為,基哥講嘅啱一半,唔啱又一半。傳統僑社冇錯多有自己嘅會址,鋪位收下租,麻雀抽下水,確係可以維持皮費,無後顧之憂,但問題係後繼無人,老一輩嘅會員或去咗見上帝,又或者搬離華埠,極少到唐人街,佢嗰啲“竹升”仔女,除咗小時候會跟父母參加春宴之外,大個咗之後,想佢哋到會所?啋你都啦!至於新鄉里亦多極有限,同時亦未必會入會。例外嘅係福州人,1995年之前,人數不多,其後大量湧入,紛紛成立自己嘅會所,好生興旺。

  其實會所好重要,特別係1980年代之前,會所係維繫鄉誼、兄弟姐妹情之地,尤其係初到貴境嘅人,必定會參加會所,休息日,到會所打牌傾偈,失業時亦到會所睇下邊間餐館請人。例如鄉下係深圳嘅八友1973年來美時,老爸帶八友入大鵬會所,後來又參加崇正會、東安公所,從而認識唔少鄉親,學做企枱同第一份工亦係鄉親介紹。當然,依家華人喺美國嘅活動範圍較以往大咗好多,會所之功能已減低,但會所仍有一定之價值,係華人不可或缺嘅地方,“得閒不妨回家看看。”

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版