您的位置: 首页/八友集/ 被控性侵 波神竟忘科比案

被控性侵 波神竟忘科比案

Apr 11, 2019, 01:04 AM

  NBA季賽已近尾聲,紐約客今年再度失望,因為紐約尼克斯隊又打唔入季後賽。不過,雖然係墊底,但有希望抽到狀元簽,假如下個季賽再簽到兩件頂級球星,不但好大機會重返季後賽,更有望問鼎總冠軍。可惜尼克斯放走波神(波爾冿吉斯),否則機會更大。講起波神,依家佢麻煩大矣!因為佢被一名女子控告佢性侵。據講事件係咁:波神係舊年2月7日晚因為膝蓋前十字韌帶重傷退出比賽,當晚凌晨番到屋企,約咗隔離屋一個23歲小姐入屋傾偈療傷,傾傾下傾上床。雲雨一番後,波神答應俾6萬5銀對方嘅細佬讀大學。點知波神完鬆,至今未付款,嗰位小姐於是報警,控告波神“食嘢”唔俾錢。根據警方調査所得,女方言詞可信。

  “色字頭上一把刀”,老番唔知中文之妙,知道後或者會規行矩步。好似波神,7呎3吋高,青靚白淨又英俊,正式係白馬王子,可能自恃自己係“女人湯圓”,靚女會投懷送抱,自動獻身。但呢個世界靚仔食唔到飯,冇錢同鬼講,你唔肯俾錢,幾多唔告到你甩褲,何況閣下係“錢途無限”嘅NBA球星,依家件事擺上枱面,睇怕唔止6萬5銀咁少矣!“唉!波神,你太年輕矣!乜你嘅前輩科比冇講你知佢嘅慘痛経驗咩!全世界都知囉喎!”

  十幾年前,科比喺酒店邂逅一個年輕白女,把酒言歡,上床再深入了解。科比以為一夜情好平常,超級球星肯臨幸你,係你之彩數。點知亞女啋你都儍,知佢係球星,仲知佢大把錢,於是告上法庭,指控科比強奸。呢單案,足足打咗大半年,“爛佬怕潑婦”,卒之庭外和解,賠咗大筆錢,最慘搞到科比差啲離婚,要買番隻100萬銀鑽戒俾老婆求謜諒。

  已經過檔“獨行俠”嘅波神尚未大紅,遇上呢單性事,有排頭痕,如果處理唔好再加上自己傷病,分分鐘斷送大好前程也。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版