您的位置: 首页/八友集/快鐘慢鐘 固定一鐘唔擾民

快鐘慢鐘 固定一鐘唔擾民

Mar 13, 2019, 01:55 AM

  “喂!主席,約你1點開枱,依家幾點呀?足足遲到1個鐘頭,累我哋三缺一,你有乜解釋?”夏令時間撥快鐘嗰日,會所三位元老見前任主席“神經刀”施施然而至,不禁鬧佢係“遲到大王”。“邊度係呀!依家仲有3分鐘先至係1點,我無遲,係你哋擒擒青,早到咗之嘛。”“你係咪唔知到較快鐘呀?”“乜較快鐘咩!我真係唔知喎!唉!其實一年較兩次鐘,咪話對我哋上咗年紀嘅人來講唔方便,就算年輕人都覺得煩啦!點解政府唔好似香港咁,用梗夏令時間呢!咪唔駛擾民囉!”“神經刀”有感而發。“夏威夷同亞利桑那州已經用梗夏令時間啦!”八友提示。“咪就係囉!叫特朗普下一 道“聖旨”啦!”

  總統先生雖然冇頒“聖旨”,但11日喺推特發文,表示“永久實施夏令時間,我覺得幾好,支持”。不過,全美能唔能夠永遠實施夏令時間,并非總統講咗就算,係要等國會投票表決。據悉,支持實施夏令時間嘅人認為,撥快時鐘有助減少能源消耗。同調整後嘅夏令時間相比,冬季標準時間反而更令民眾不滿,佛州去年就通過《陽光保護法》,全州內全年維持夏令時間。來自當地嘅聯邦參議員日前再向國會提交議案,建議措施擴大至全國,同樣代表佛州嘅聯邦眾議員Buchanan亦已向眾院提交相關議案。如果《陽光保護法》過關,全美所有地區就會永久實施日光節約時間,議員目前辯論之焦點,環繞調撥時鐘會否擾亂睡眠、會唔會影響健康,同埋民眾會唔會因此調整作息時間等。八友覺得,通過嘅機會較高,因為秋天撥慢鐘,春天撥快鐘,係會對人們作息做成困擾。好似八友,呢兩日仲係覺得烏眉恰睡,仲未回復時差。如果國會傾唔掂,咪全民投票囉!

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版