您的位置: 首页/八友集/ 醜態爭食 退一步海闊天空

醜態爭食 退一步海闊天空

Mar 12, 2019, 01:37 AM

  舊年網路上出現一段視頻;一批中國遊客喺泰國餐廳吃自助餐時,眼見一盤盤大蝦上枱,紛紛上前哄搶,有人甚至用大餐碟鏟起一大碟,滿載而歸,個中醜陋行為,令人側目,如果食得嗮仲有得講,弊在起身出門上車時,剩低大把蝦喺枱上,呢種寧嘥都唔益人嘅不文明性格,幾時先至有得改?

  唔好以為此種陋習,中國人先至有。上個禮拜,喺皇后區某華人自助餐廳,發生西裔家庭成員同非裔家庭成員因為爭奪蟹鉗而大打出手事件。據講,有個小朋友攞咗幾隻蟹鉗之後,番轉頭又再去攞過。另外一個食客唔抵得,用“蘿柚”將小朋友撞開,於是兩個家庭由囗角繼而動武,視頻所見,拳頭與膝腿齊飛,亦係醜態畢露。

  俗話說“退一步海闊天空”。話明係自助餐,會陸續有來,蝦蟹等海鮮雖然較多人鍾意,但餐館點都唔會限量供應。食幾多,攞幾多,呢種係食嘢嘅態度,并非弱肉強食。八友想起有次喺唐人街某茶樓飲茶時,睇到一碟炸粉果,於是叫要,點知另外一枱客亦同時叫,由於只有一碟,點心員左右為難。“你哋要啦!”八友禮讓。“唔好,你叫咗先,你要啦!”對方禮尙往來。“我哋已經食咗幾碟點心,你哋啱啱坐低,都係你食先啦!或者一陣間仲有呢!”“好,唔客氣嘞!”過冇耐,炸粉果再次出爐,嗰枱客驚八友睇唔到,叫住點心員,八友同佢相互微笑點頭。“禮也。”如果當時大家都為爭取一碟點心而心生不忿,不論邊個爭嬴,雙方內心都有條刺,互相禮讓之後,大家都高興。

  “退一步海闊天空。”誠不我欺。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版