您的位置: 首页/八友集/法國示威 舞獅贈慶秋後算

法國示威 舞獅贈慶秋後算

Feb 11, 2019, 01:39 AM

  法國“黃背心”暴動喺過去嘅週末再度登場,屈指數來,已經連續13個禮拜六走上街頭抗議,嗰日睇電視新聞,聽講全國仍有超過5萬人參加。

  喺巴黎,抗議者同警方之間衝突,抗議者喺社群網站同街頭宣稱“唔會罷手”。新聞報導員又說參加暴動者仲包括醒獅隊,八友瞪大雙眼睇下真定假,果然,喺煙霧彌漫嘅街頭上,有幾個舞住獅頭嘅人奔跑跳躍,至於有冇鑼鼓,聽唔到。舞獅者唐人抑係法人,亦睇唔清楚。

  八友心諗,依家正係農曆佳節,法國都有唔少華人社團慶祝,學過舞獅嘅法人趁“熱鬧”,帶住獅頭上街想吸引其他人注意。更有可能係武館想招學生,諗出呢條死計。

  友人大隻講說,法國佬俾“黃背心”搞到焦頭爛額,你班友仔竟然舞獅上街慶祝,依家冇時間處理,但肯定會秋後算帳,等局勢穩定之後,慢慢計數,到時,舞獅嘅社團武館或遭池魚之殃未定。

  “法國佬唔會咁小氣啩!”1982年秋,唐人街反對市府喺巴士打街興建監獄,發動萬人上街抗議,為咗表示“醒獅”已醒,社區邀請咗龍形瑞獅團舞獅帶頭,《紐約每日新聞》用咗張大圖片做頭版,其後舞獅團體亦冇被政府刁難,反而受到當時市長郭德華喜歡嘅華埠活動。所以法國華人社區,唔駛太過擔憂。

  八友同八仔訂咗夏天到英國旅遊機票,八媳本來打算去埋法國,但怕“黃背心”沒完沒了,決定唔去。

  八友都認為正確,因為法國政府仲係寸步唔讓,有同示威者鬥到底嘅決心。睇嚟,政府就算今次唔俾示威者玩死,都會五癆七傷也。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版