您的位置: 首页/八友集/保護自己 學拳腳防狼免辱

保護自己 學拳腳防狼免辱

Jan 12, 2019, 02:00 AM

  唔好以為小女子好欺負,否則蝕底又冇面嘅係自己。日前,喺佛羅里達州就出現一幕小女子還擊大隻佬嘅事件;喺一間快餐店入面,一名叫泰勒男顧客可能搵唔到飲筒,竟然用粗口鬧櫃枱一個叫詹姆斯嘅細粒女店員,跟住一手扯住詹姆斯衣領,以為可以將呢個靓妹成個扯出櫃面。點知詹姆斯好似阿里上身,不斷出拳瘋狂打向泰勒,將扯住佢衣領嘅鹹豬手打甩,拳拳有力。後尾一名員工同店舖經理先後分開兩人。泰勒大叫要求炒靓妹魷魚,“你以為啦!你去坐監就有份。”詹姆斯不甘示弱。事件過程有顧客攝錄放上網,後來真係執法單位介入調查,拘留泰勒,控以兩項攻擊罪。

  “以為靓妹好蝦,門也沒有。”原來,詹姆斯真係學過拳擊,“小隱隱於市”。詹姆斯一直冇張揚,但俾人咁“蝦”法,死就死啦!一於還擊。好彩佢冇因為呢件事俾老板炒魷魚。八友建議佢轉工做女保鏢,因為睇佢出拳出拳狠且辣,唔做保鏢會嘥料也。八友認為,社會治安并非太好,女仔人家亦要武裝自己,唔駛怕醜,學下拳擊、功夫,一來當健身,二來可以保護自己,遇到色狼時可以送對方兩拳一腳,“二龍爭珠”、“撩陰腿”都係救命絕招。想起有次五分局警民會議,有位女士就問局長吳銘恆有乜方法保護自己免受侵害?局長叫佢發覺唔對路時,立即報警。“就怕遠水救唔到近火。”女士嘅擔心不無道理,例如數年前一名慢跑女子就不幸被人拖入暗角奸殺。所以,學習防身狠招係有必要也。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版