您的位置: 首页/八友集/閘車斬人 幫派內訌憶華青

閘車斬人 幫派內訌憶華青

Jan 9, 2019, 02:03 AM

  大家睇黑社會電影睇得多,最近香港出現真人真事真版本,新義安黑幫肆無忌憚,日前公然喺鬧市閘車斬人,視警方如無物,公然挑戰警方,警務處長大叫可怒也,“老虎唔發威當病貓”,隨即展開雷霆大搜捕,行動仍在持續,警方強調有能力制止黑幫廝殺。據消息稱,新義安同門內訌自去年九月至今未平息,起因係一名女子喺尖沙嘴夜場鬧事,得罪一名頭目,後來喺將軍澳被斬,對方為報復向敵對人馬燒車。新義安尖沙嘴、將軍澳兩幫人不斷“開片”,燒車、斬人愈演愈烈。直至元旦夜,尖沙嘴新義安成員被攔車追斬,疑有人“覆灼”,最終引發昨日太子道東行車線追車斬人案。光天化日行兇,實在駭人聽聞。

  由香港黑幫內訌,令八友想起N年前嘅紐約華青幫“籠裏雞作反事件”。惡名昭著嘅“幽靈幫”係1970年代初期崛起嘅華青幫,第一代幫主綽號“大盜”,行事心狠手辣,打劫勒索無惡不作。非法得來嘅錢財自己佔一半,因而引起手下不滿,佢嘅頭馬“蟲仔”密謀作反,最終成功。“大盜”落台後仍時不時喺勿街土庫底打麻雀。“蟲仔”想佢消失,乃安排一名手下喺某日吼正“大盜”打牌時,到土庫底向“大盜”開槍。“大盜”中彈送醫,大難不死。

  “蟲仔”做咗幾年大佬後,有次佢出國歸來,佢嘅手下第一殺手“西瓜”同佢講“班兄弟要你讓位。”“蟲仔”乃召開會員大會,喺眾兄弟逼宮下,唯有退出唐人街,轉而到皇后區搵食,成立“白獅幇”。“幽靈幫”新人吉仔上位,但難以服眾,有次被手下追殺,竟然逃入五分局求助。真係唔到你唔信,呢個“幽靈幫”周時換大佬,令人目不暇給。反觀其他華青幫派,除咗大佬坐監或上咗西天之外,現職幫主就一直做落去。上述故事乃一名退休神探介紹,八友補充,如有雷同,實屬巧合。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版