您的位置: 首页/八友集/違反法案 雙節棍重見天日

違反法案 雙節棍重見天日

Jan 8, 2019, 01:45 AM

  睇過李小龍電影嘅人都知道“李三腳”嘅隨身武器雙截棍犀利,當者披靡,於是受到熱愛運動人士歡迎,紛紛購買練習,一方面用作防身,另方面希望自己成為李小龍第二。由於學習者多,必有意外發生。愛民如子嘅紐約州眼見意外頻生,乃喺1974年頒下禁令,完全禁止私人擁有雙節棍。賣雙節棍嘅功夫體育用品公司同鍾意學棍嘅人士大呼冇民主自由,但抗議無效。造棍公司心有不甘,打聽“硬棍危險啫!造軟棍得唔得?”州法院法官試過軟棍冇殺傷力後,批准,始有“微軟”棍面世。

  但呢種微軟棍並不過癮,於是有武癡私藏硬嘢。其中有個叫Maloney嘅人不但偷偷擁有,仲教自己個仔學習佢自創嘅雙節棍搏擊術。可能佢個仔拎碌棍出去炫耀打架,Maloney喺2000年被告上法庭。“我唔服。”Maloney向納蘇縣地區檢察官提出上訴,呢單官司一直打咗18年,上個月中終於有咗結果。布碌崙聯邦法院唐人法官陳家美作出裁決:“雙截棍禁令”違反第二修正案,Maloney上訴得值。呢項裁決,唔單止Maloney高興,鍾意雙節棍嘅朋友更加興奮,因為雙節棍將重見天日,人人都可以擁有、學習、防身。八友呼吁摣槍犯罪人士放棄槍械,改用雙節棍打劫,就算被捉到,都唔會有重罪,係咪?

  從雙節棍想起一般武館嘅十八般武器。喺十年前,春節醒獅拜年賀歲,武館都可以出動刀槍劍?揚威耀武,後尾可能有人舞獅期間唔覺意用呢啲冷兵器傷到人,五分局乃禁止獅隊攜帶兵器押陣,不過長棍唔受限制。“冇十八般武器帶獅,唔過癮啫!依家雙節棍解禁,刀槍劍?幾時可以重見天日?”有師傅咁問。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版