您的位置: 首页/八友集/防備打劫 重點培訓開門人

防備打劫 重點培訓開門人

Dec 21, 2018, 02:21 AM

  打劫唐人經營嘅地下賭檔、麻雀館,一直以來都係只有自己嘅同胞先識做。因為呢啲娛樂場所,都係中式賭搏,只招待自己人。因此,以前唐人街嘅“土庫底”劫案,清一色係華青幫派一手操辦。但依家,打劫麻將耍樂場嘅竟然有外裔朋友。喺布碌仑八大道一家华人经营嘅麻雀館日前俾4個黑人哥哥、西裔弟弟揸槍聯手打劫,而且係三日之內兩劫,搶走幾千銀现金。警方話劫匪团伙可能曾踩点作案。奇怪嘅係,呢啲外國朋友點“踩點”呢?因為“雞同鴨講”,溝通唔到,佢哋又點知嗰度係麻雀館呢?八友細心睇報導,原來麻雀館對正大街,喺對面街就可以睇到竹館內酣戰情況,係人都知係乜葫蘆買乜藥啦!於是帶埋武器,拍門,“邊個?”都未等回答,已經開門,唔駛講“咪喐”,見到支槍,已經知係乜事。俾錢囉!

  “不經一事,不長一智”,經咗一事,照計長咗一智啦!原來唔係,劫匪食過番尋咪,隔冇三日,照辦煮碗,再踏上發財之路。“邊個?”又係未等回覆,將大門一開。劫匪一聲唔該,又再發財。“八友,你䁥埋睇到咩!咁清楚嘅?”友人大隻講不以為然。八友并非大隻講,而係案情推理喺咁。以往嘅唐人街賭館,都有專人培訓出嚟嘅開門人做“開門大將軍”,喺玻璃窗仔睇下㩒鐘嘅係人定係鬼。但“你有張良計,我有過牆梯”,華青會用打扮似餐館佬嘅人㩒鐘,然後頂住度門,其他兄弟一湧而入,包冇走鳮。記得30年前,八友收工後大多會到朋友開設嘅旅行社打牌,有日八友有事冇去,竟然俾兩個華青賺門入屋,拔槍打劫,當時辦公室內“筵開三席”,仲有兩個小朋友,當然冇得喐,得手幾千銀後逃去。開門嗰個睇都唔睇係咪熟人就開,俾其他人鬧到懵。所以,賭場開門人雖然人微言輕,但好鬼重要,建議賭館要對開門人作魔鬼式訓練,對可疑人,特別係老番,打死都唔開門也。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版