您的位置: 首页/八友集/活得精彩 傳奇人物伍覺良

活得精彩 傳奇人物伍覺良

Dec 19, 2018, 02:17 AM

  唐人街傳奇人物伍覺良駕鶴,享壽99歲,佢生前活得精彩,難得晚年亦健康快樂,唔駛拐杖,健步如飛,經常掛喺口邊嘅一句話“60幾歲嘅人都未必行得快過我。”人始終要去,但好似董事長(友人對佢嘅稱呼)冇病冇痛,以高齡辭世,乃修嚟嘅福氣,無憾矣!

  八友做報紙38年,入行之初已聞其名,但當時伍老己退居幕後,退伍軍人會活動,佢都只係靜坐一旁,極少同記者互動。同媒體交流係近十年,先知佢係一個講得笑,有幽默感嘅長者。或者八友喺記者中年紀最大,所以,同佢傾開偈,有時都會提到佢嘅“威水史”,例如提到某次如果唔係佢向政府有關部門交涉,唐人街都會有麻煩。八友今年退出“冮湖”時,伍老堅持要請吃飯祝賀,盛情難卻,嗰日喺勿街某餐館午餐,相陪嘅仲有退伍軍人會嘅梅本立、譚煥瑜等。伍老仲塞咗封紅包過嚟,話“利利是是”,卻之不恭,只得收下。“退休後如果冇乜地方去,上嚟軍人會打麻雀、天九啦!聽講你嘅天九段數都好高喎!”伍老記性極佳。但同佢最傾得埋嘅係一個女記者,周時同佢講笑,令到伍老開心不已,以契爺契女互稱。

  據知,伍老後生時風花雪月,工作之餘,打牌、去馬場乃經常事,晚年後收心養性,冇再賭博,但平日朝早喺酒莊坐陣後,都會到退伍軍人會打天九。最初以為係打上落一兩千銀嘅五蚊一洞天九,就算晤玩咁大,都起碼一、兩蚊一洞啦!點知唔係,乃係5分錢一洞,上落最多係10元8塊,喺衛生到唔衛生嘅牙較戰,真正係“返璞歸真”嘅娛樂。又聽講,伍老好少服人,但八友知佢起碼服一個人,就係新中國第一任總理周恩來。因為3年前訪問佢,佢話:“我冇见过陈纳德将军,但我见过周恩来总理。”因為1944年中国国民党同中国共产党喺重庆会谈,美国作为第三方参与,伍覺良任翻譯員,当时周恩来係中共谈判团的首席代表。伍觉良说,他亲见周恩来的谈判手段,只能用四个字形容,就是“一流人才”。伍老現今人生謝幕,一路走好。

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版