您的位置: 首页/八友集/ 善待長輩 遺產可能有得分

善待長輩 遺產可能有得分

Dec 4, 2018, 01:18 AM

  有時睇報紙新聞,會發現唔少獨居老人遭子女遺棄消息,令人難過,其中原因可能係老人家病痛纏身,而重要嘅係身無長物,既然冇錢又要人照顧,因此一啲逆子逆女就把心一橫,對老人家不聞不問。不過,如果佢哋發現原來老人家收埋一筆錢,必定後悔不已。

  喺台灣,有個老婦人自從獨仔過世後,自己獨居安養中心,因媳婦一次都冇探過佢,臨死前將台幣1600萬元積蓄,送俾經常探視並同佢買日用品嘅保險員夫婦;佢嘅媳婦一怒之下控告保險員詐欺、偽造文書,但台北地檢署調查發現,老人送遺產時有錄影公證,決定唔起訴。

  不孝媳知唔知家姑仲有一筆咁大積蓄?相信係讀者嘅疑問。大隻講就認為一定唔知,因為如果知道嘅話,就算唔接番屋企供養,都會時不時去安養中心噓问暖,慢慢等嗰筆遺產。但亦有人說,媳婦一定知道家姑仲有一舊錢,覺得家姑已經冇人冇物,兩腳一伸後,呢舊錢唔係俾自己仲可以俾邊個?點知佢計錯數,家姑寧願俾外人都唔俾不孝媳。相信不孝媳呢世都瞓得唔安樂矣!

  聽人瑞中心主任伍寶玲講,紐約市約有150萬年過60嘅長者,佢哋大多數過住兒女媳婿賢孝嘅生活。

  當然,亦有例外者。有個僑社學者,70幾歲時就俾仔女送入療養院,有啲朋友去探佢,學者就感嘆朋友仲好過子女。朋友只有溫言安慰。

  八友奉勸年青人,做個榜樣俾自己仔女睇,對自己嘅父母盡下孝心,否則你點對自己爹媽,你嘅仔女將來亦會點對番你,明未?

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版