您的位置: 首页/八友集/ 妻妾和睦 呢種齊人享女福

妻妾和睦 呢種齊人享女福

Dec 3, 2018, 00:33 AM

  日前與幾位朋友茶聚,其中一個叫何世嘅爛賭友人話已經訂咗機票番大陸。“喺大陸過春節?”“一方面係,另方面要老豆分身家,唔好淨係益個二奶。”“你二媽係嘛?”朋友笑佢冇大冇細。“好難。”阿世話佢老爸“大細超”,將深圳兩個物業寫咗二奶個名,反而佢兩兄弟冇份。“咁你老母仲喺唔喺度?”“喺度,都唔知幾咁精神,日日打麻雀。”“佢有冇同你老豆嘈,要趕二奶走?”“咁又冇喎!老母反而幫二奶。有次我細佬同二奶吵大鑊,老母竟然鬧個仔,話再嘈就死俾我哋睇,真係吹漲,你話有冇見過咁大方嘅女人,自己老公俾人搶咗,已經要同對方死過啦!仲好心幫人。”“可能你阿媽唔想頭家散咗,又為咗你兩兄錢途,唯有瘖瘂抵囉!番到深圳,千祈唔好大吵大鬧,如果唔係,你想分身家都幾難。”

  老公係自己嘅,點可以分俾人?但有時為大局著想,唯有死忍。例如最近慶祝96歲生日嘅賭王何鴻燊,除有大婆之外,仲有二、三、四房妾侍,難得幾房姬妾相安無事,并無爭風呷醋,各擁山頭,各自為政,羡煞旁人。主要原因當然係賭王有鄧通之財,分派每個愛人,試問邊個敢哼半句。又已故名伶劉克宣,有五房女人,居然住喺同一屋簷下,而且和睦,輪流煮飯打牌。有人話喺老一輩中國人社會,納一兩個小星,乃等閒之事。

  香港曾經受大清律例保護,納妾晤犯法。至於現代社會,老公搵多個女人,老婆唔出聲,原因不外乎:老婆懦弱,知道一嘈,個家就會散,只好忍讓。

  僑社中不乏呢啲人,有某僑領就經常帶住大婆二奶,出席早午晚宴活動,兩姐妹不知幾好傾。“呢種係中國婦女傳統美德乎?”

本文版权属“纽约侨报”所有,未经授权请勿转载。违者将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版