您的位置: 首页/八友集/丟人老味 阿婆打牌發爛渣

丟人老味 阿婆打牌發爛渣

Nov 8, 2018, 01:28 AM

  講起打麻雀趣事,意猶未盡。有個住紐者市嘅91歲阿婆,幾乎每日都到會所等打麻雀,但佢年紀大,眼矇手慢,摸一隻牌再睇自己前面嘅牌一輪,往往要十零廿秒時間,佢囗中雖不停講“對唔住,唔好意思”,但隻牌遲遲未出,連耐性好嘅八友都忍唔住,其他牌友更加唔駛講。阿婆脾氣又大,有次輸得多,心情更差,上家喫咗佢一番,佢拎張100蚊紙俾人找。上家話“咁大張呀!5蚊啫,欠住先啦!”阿婆當場發老脾:“丟你老味,你嬴得幾多就嬴,阿婆大把錢,唔駛喺度單單打打。”跟住又係一輪粗口鬧過去,鬧到上家懵咗。總務睇咗過眼:“人哋又冇得罪你,駛唔駛丟人呀!你自己都係女人。”

  喺會所打牌,下午茶時間有包點食。一次,阿婆攞咗一個,又想揀另一個會唔會啱口味啲。會所一個老職員鬧佢:“一人衹有一個,物你咁貪心,豈有此理,你老公係會員,你唔係喎!”阿婆當場起火,鬧番轉頭,“杏加橙”粗口連珠爆發,又拎起把雨遮想要撲過去。老職員說:“嚟啦!第二個怕你,我唔怕你?!”兩個老人家,當然打唔成。冇乜人同佢打牌之後,阿婆仍好勤出會所,坐喺牌桌後睇人打牌,有時三缺一,只好邀請佢落場,“受慢的折磨”。其實,八友冷眼旁觀,阿婆有時又OK嘅,例如有個牌友抱住個啱啱満月嘅BB女到會所閒坐,佢會封個紅包祝福“快高長大”。八友有時同佢傾閒偈,佢都幾友善。心諗“不如叫佢戒咗粗口,唔好鬧人鬧得咁毒,積番哋功德啦!”迴心一想:咁大年紀,性格自細生成,邊有得改呢。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版