您的位置: 首页/八友集/造謠擠兌 華资銀行曾此苦

造謠擠兌 華资銀行曾此苦

Nov 7, 2018, 02:31 AM

  銀行擠兌,往往係由謠言引起。日前,四川省就有一單:自貢銀行近日有十多間分行都爆發瘋狂擠兌提款潮,原因起於一篇網路貼文,指該銀行有三大股東捲款400億元人民幣潛逃。雖然呢則貼文喺20分鐘內就遭當局刪除,但大批民眾已湧向各分行,甚至有擠兌民眾出現身體不適,被醫護人員抬走。當地警方之後聲稱拘捕了一名葉姓網友,指佢已承認散播不實謠言、惡意中傷,而造謠者亦直認不諱,此案正在調查處理中。中國人民銀行自貢市中心支行也發布公告稱,自貢銀行足額繳納了存款準備金,支付能力充足,希望存款人能夠理性看待事件。

  睇完呢單新聞,八友想起紐約唐人街亦曾經此苦。大約20年前,國寶銀行身遭暗箭,被謠傳資金不穩,於是爆發擠兌潮,存戶喺國寶銀行門前排起長龍,國寶董事長孫啓誠處變不驚,宣佈銀行有足夠銀両應付。傳統僑團、閩籍僑團嘅僑領亦向僑胞喊話,呼吁僑胞冷靜,唔好信謠言。幾日之後,擠兌潮退燒,國寶銀行不損分毫。

  又1984年,東方銀行亦爆發擠兌潮,聽講有人喺衣廠散佈謠言,話東方唔掂,於是一傳十,十傳百, 一路傳落去,存戶喺東方門外排隊一直排到宰也街。時任東方嘅董事長陳子超開記者會,俾記者拍攝堆起好似一座小山嘅鈔票,話東方有充足鈔票應對存戶需要,希望僑胞理智,唔好信謠言。经過約一個禮拜嘅提款潮後,果然係“東方不敗”。大家不可不知,美國嘅每間銀行都有聯邦嘅FDIC保障,你哋嘅存款,一定走唔甩!

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版