您的位置: 首页/八友集/絕子絕孫 打麻雀小心講話

絕子絕孫 打麻雀小心講話

Nov 5, 2018, 02:03 AM

  “圍埋砌幾圈論英雄”係消閒娛樂。打麻雀之餘,我哋仲要注重個人修養。喺麻雀檯上,好牌品者不但證明此人冷靜,而且仲會受人尊重,繼而減少喺麻雀檯上爭拗。 八友打咗四十幾年麻雀,係人都讚好牌品,話有女都要嫁俾八友。係鬼咩!

  八友打麻雀係願賭服輸,亦唔會有“食煙洗手熨櫃桶”等小動作。手風順,周時自摸,自然粒聲唔出俾牌友鬧幾句,如果四圈唔開糊,頻頻出衝,最多輸到面紅,甚至自我解嘲,唱下“我淚似簾外雨”。唔似得有啲人輸唔起,將牌一推:“咁滯,唔打啦!”曾見過兩名上咗年紀嘅雀友,嘈嘈下,幾乎喐手,何必呢。

  嗰日喺某客家會所打牌,隔離枱就出現爭抝,幾乎喐手事故:一名上咗年紀嘅女人被對家中年男子話佢詐糊,女人唔認,話咁咁咁,一番食得,唔係詐糊。男子話佢擒擒青將牌推走,以為人哋睇唔到,又話呢次算啦!下次冇情講。繼續打牌後,女人長氣,不停話自己上一舖唔係詐,佢打咁耐牌,未食過詐糊。男子見佢鳮啄唔斷,於是講出佢頭先付牌係乜乜乜,爛花,唔係詐糊係乜?“嗱!我同你一齊發誓,如果我係詐糊,我絕子絕孫。否則就係你絕子絕孫。”女人說。客家人最驟忌呢樣嘢,男人拍枱大罵:“你講乜Q嘢?你自己絕子絕孫就好啦!你係咪想我用粗口鬧你,假如你唔係女人,我一定打你。”“依家你都可以打!”女人睇硬對方唔敢喐手。同桌嘅雀友亦相勸:“打幾個錢麻雀啫,駛乜講到“絕子絕孫”咁難聽呀!”喺眾人勸阻下,一場風波暫時平息,當然,牌局亦散咗。八友亦覺得女人失言,“絕子絕孫”呢句話點能夠出得口,講“打親麻雀場場輸”咪得囉!

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版