您的位置: 首页/八友集/暗戰難防 職場要穿避彈衣

暗戰難防 職場要穿避彈衣

Oct 11, 2018, 01:33 AM

  職場勾心鬥角,汝虞我詐,一個唔小心,隨時粉身碎骨,死咗都唔知乜事幹。就以八女為例,年多前轉入一間跨國商業公司打工,發現同佢一個組有兩個大學唐人同學,“他商”遇故知,當然自有一番歡喜。可能八女有啲能力,俾老細睇起,時不時派佢出差,頗受兩個同學妬忌。早個禮拜八女喺洛杉磯出差歸來,佢老細同佢講,要八女去另外一個組。八女心諗“唔係想炒我魷魚呀嘛?”老細知佢心想乜,笑謂:“唔係乜意思,係為你好。因為我哋依家呢個組遲得一兩年會解散,我會帶你哋6個人去另外一個組,呢個組好大,資源充足,喺呢個組做嘢,定過抬油。”老細講咗邊6個人,其中一個係佢同學,另外 一個則留番原來嗰組。

  八女高興之餘,亦為冇份調組嗰位同學難過。點知難過未完,就聽到有同事爆料,有份調組嗰個同學竟然同老細講:“八女資歷不足,應該留喺原組磨練,不如調同我一齊嚟嗰個同學啦!”但老細冇理佢,話定咗喺咁就係咁。八女知道呢件事後嬲爆,話佢哋兩個喺好朋友啫,都冇理由要踩佢背脊上位。八友話八女似老豆,太過老實,一樣米養百樣人,呢個世界乜牛鬼蛇神都有,自己要小心提防,雖然“不招人忌是庸材”,但暗戰難防,平日要著多件避彈衣至得。

  咪話大公司有咁嘅情形發生,細到連餐館仔亦有你想我死,我要你亡嘅事件出現。話說43年前,八友喺紐者士一間中餐館做禮拜尾散工,第一日番工,換咗“馬騮衣”,出到餐堂,已経聞到火藥味,但聽見一名肥壯経理高聲說:“乜乜黑衫已經被炒,邊個係佢人馬嘅,好自動離開。”見八友生面口,問:“你係咪乜乜介紹嚟嘅?”“唔係,係物物帶我嚟做嘅。”嘩!咁先冇事,呢個世界真係。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

NYC VOTE
关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版