您的位置: 首页/八友集/浪漫過頭 求婚記變失業記

浪漫過頭 求婚記變失業記

Oct 10, 2018, 01:56 AM

  喜事如果變成壞事,會令人特別沮喪,特別係浪漫嘅喜事,以下就係其中一件:月前一架西安飛銀川嘅班機上,一名空姐嘅男朋友突然出現,單膝下跪向拍拖四年嘅女友求婚,空姐感動落淚,話“我願意”,答應男友求婚,兩人并相互擁抱、錫錫。機上乘客受浪漫氣氛感動,紛紛以熱烈掌聲支持,唔少乘客用手機拍下呢段浪漫影像,更有人興奮喊:“咀大力啲!”空姐接受求婚後喺機上廣播:“其實我真係唔知道,我嘅男朋友會出現喺班機上向我求婚,多謝各位父老鄉親見證。”

  點知好事變壞事,呢場咁浪漫嘅求婚活動竟然被人破壞,而“破壞王”就係呢個空姐工作嘅航空公司。空姐喺落機後接到被公司開除通知,原因係這場求婚引起騷動,公司認為“咁樣會影響飛機安全,對其他乘客人身構成威脅”。消息喺PTT上引發討論,有網友認為上班時間本來就唔應該進行私人活動。但有人認為航空公司開除空姐有啲過份,因為空姐當時唔知自己會被求婚。

  八友認為後者講得啱,因為空姐真係晤知自己男友會失驚無神喺飛機上向佢求婚吖嘛!咁浪漫嘅嘢由自己鍾意嘅麻甩仔以行動表現出嚟,點會唔感動到喊,當場答應,仲話感謝乘客見證。點知公司揸正嚟做,“豉椒炒魷”,就好似一件美好嘅藝術品,被當場打碎。其實法例不外乎人情,將空姐記一次大過,“下不為例”就算啦!依家空姐失業,點算,如果男友係個有錢人,問題不大,否則婚後“牛衣對泣”,豈不大鑊!又空姐被炒後,遷怒男友:“都係你條死契弟,累我失業,分手。”而男友會否羞愧交加,投江自殺?

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版