您的位置: 首页/八友集/疊字肉麻 情侶詐嬌勿擾人

疊字肉麻 情侶詐嬌勿擾人

Oct 9, 2018, 01:24 AM

  “喂!你睇我著呢件衫靚靚?”“你幾時都靚靚啦!”日前八友同八仔一家喺某華人顧客眾多嘅百貨公司購物時,聽到咁嘅對話,回頭一望,原來係一對中年唐人男女試衫,女人將件套裝披喺身上,用疊字“靚靚”問男人。男人又番“靚靚”疊字回答。八友當場起雞皮,吩咐八仔“我哋快啲走走。”

  用疊字,通常有兩種用法,一係同5歲以下小朋友下達命令:“出面凍凍,著多件衫衫。”“禽咁高高,因住跌死死。”呢種係慈愛嘅叮嚀,喺乜場合講都冇問題。另一係情侶或夫婦,就衹能夠係夜半無人私語時講疊字,點講都冇問題:“你嘅皮膚真係滑滑,我要摸摸。”“你幫我戴袋袋,等我爽爽。”雖然“情到濃時總是癡”,但男女喺公眾場合講疊字,就算冇嗰種調調兒,旁人都會受不了。記得睇過一篇八卦新聞,“小超人”李澤楷追梁洛施嗰陣,時不時喺公眾場所講疊字:“呢條魚魚好新鮮,小心骨骨。”記者話聽到毛管戙。

  無可否認,情侶相處期間以疊字詐嬌,會增添情趣,但喺公眾場合過分肉麻,隨時會妨礙到旁人。日前喺一社交網站群組睇到一篇發文,當事人分享自己一招反擊肉麻情侶,獲不少網民讚好。該名網民話近日到餐館喫飯時,旁邊一對情侶一直大聲交談,期間女生更不斷以疊字講話向男友撒嬌,“老公,呢個熱熱,你幫我吹吹”、“老公,我要食肉肉”等等,發文者話忍無可忍,因此等企枱行近時,大聲向對方話:先生,呢個盤盤幫我收收!仲有呢個杯杯同我加水水。該對情侶聽到,大感尷尬,因此喺用餐完畢前,都再冇發出任何聲音。而該名企枱事後亦向發文者感謝,話佢都頂唔順呢對情侶矣!

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

NYC VOTE
关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版