您的位置: 首页/八友集/ 選錯地方 青山不幸埋傻骨

選錯地方 青山不幸埋傻骨

Sept 12, 2018, 01:25 AM

  友人肥彭日前出發江南黃山遊,之前曾邀八友作伴,但自己依家年紀有咁上下,上山下崗有一定難度,況且黃山已經去過兩次,已慰生平。又知肥彭好奇心極強,乃吩咐佢要跟導遊指示前進,唔好為探險而離隊,一來危險,二來要出動搜救隊搵人,就算搵到,都要俾搜救費。“唔係!咁都要俾錢。”千真萬確:調查發現,近年來“任性”遊客遇險事件經常發生,據統計,2016年黃山堵截、查處驢友違規就有24批、212人次,搜救成本有時達幾萬銀。一定程度上造成公共資源消耗,所以有景區同地方開始實施付費救援規定。而黃山景區兩個月前正式實行《黃山風景名勝區有償救援實施辦法》,唔遵守規定而被困嘅遊客,需要喺被救出後支付救援費用。

  八友覺得,如果遊客硬闖未開發景點而發生意外,可以講係咎由自取,就算魂斷異鄉,亦怨不得旁人。中國嘅名山大川,氣勢雄偉,尚未開發之景點多的是,對喜歡冒險之人嚟講,能一探秘奧,實乃人生一大快事。不過,呢啲地方存在之危險指數亦相當大,萬一“青山不幸埋傻骨”,豈不是大煞風景。

  講起大煞風景,就真係有唔少人選擇自殺於大山中。喺早個禮拜,四川峨眉山景區發生一宗女遊客跳崖事件。旁邊雖然有多名遊客不停勸解,希望阿女放棄輕生念頭,點知佢最仍縱身一跳,當然香銷玉殞啦!兩個月前,一名男子喺東邪、西毒、南帝、北丐、中神通論劍之華山所在地“論劍亭”,自己解開安全繩跳下棧道。又3個月前,一名懷疑因為高考失利嘅男仔,喺湖南張家界天門山跳落。你話咁跳法,仲有冇得剩?就算搵得番,都係東一塊,西一舊咋!陰功。係咪係名勝古蹟輕生,特別過癮?好似舊金山嘅金門橋,聽講唔想做人嘅人見到呢座橋就想長眠於此,於是走上去,湧身跳落。唉!難明。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版