您的位置: 首页/八友集/效丁勤時 白思豪要撐甲店

效丁勤時 白思豪要撐甲店

Aug 10, 2018, 00:38 AM

  大家有冇睇過馮小剛嗰套電影“沒完沒了”?如果未睇過,唔駛上網睇番,有一部現實舞台版本嘅“沒完沒了”正在上演,而且唔知做幾耐,因為參演嘅臨記比較得閒,更熱情高漲,就算唔駛人工,佢哋都會義演。

  呢部名為“沒完沒了之指甲店風云”開演於今個月3日,開機地點係布碌仑东佛拉特布什地区嘅“888幸福新紅蘋果”。兩名做完美容指甲嘅非裔美女,發覺做得唔啱佢哋心水喎,唔肯俾錢,“食霸王餐,唔得”。雙方由口角繼而拉址,突然間,有員工拎起掃把自衛拍打當方。“你好嘢!”“沒完沒了”兩日後正式上演。識享受休閒生活嘅非裔人士聞知自己友遭欺負,仲得了,於是打起銅鑼,號召同鄉前往“三條8”示威抗議,性格較衝動可愛嘅非裔今次唔係幾得人鍾意,佢哋唔做和平示威行動,連日來掟玻璃、掟鞋、掟石,就係唔肯掟金銀珠寶,有條友唔知係咪飲咗咳水,興奮過頭,仲掟傷一個維持秩序嘅警察,搞到要被通緝。而最唔好彩嘅係該區其他指甲店,遭池魚之殃,俾示威者照掟可也。呢種冇理性嘅行為,連做緊指甲,理智又守禮義嘅非裔亦不值自己友所為,直斥佢哋亂Q咁嚟,點知反被鬧“非奸”。

  穿越1990年,紐約首任非裔市長丁勤時就職,布碌侖一間韓裔雜貨店老板同非裔顧客發生衝突,氣燄衝天嘅顧客立即號召正在“度假”嘅自己友喺該雜貨店前示威,每日幾十人,又喊又叫。丁勤時愛民如子,安排咗一日前往雜貨店購物,八友亦有前往採訪。但見丁市長到場後,接受示威者歡呼之餘,喺店內買咗啲生果、泡菜,又安慰咗老板幾句。不過,抗議仍冇停低,嗰間雜貨店後尾有冇頂唔順而執笠,唔記得。

  向指甲店擔牌嘅非裔會唔會執行“連坐法”,即係走到曼哈頓、皇后區等指甲店抗議,唔知。八友建議,市長白思豪不妨效法丁勤時,帶同佢嘅非裔老婆,前往“三條8”做番次指甲美容,連非裔第一夫人都撐和平咯,或者示威者肯俾面呢!

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版